Papa Leon XIV rikthehet pas operacionit dhe thotë se sinqeriteti është një kërkesë e besimit të vërtetë

Papa Leon XIV ka bërë paraqitjen e tij të parë të madhe publike që nga operacioni për kancer në mushkëri, duke përcjellë një mesazh shprese për të gjithë ata që përballen me sëmundje. Gjatë Meshës së së Dielës, të drejtuar nga ballkoni i Pallatit Apostolik, përballë Sheshit të Shën Pjetrit, Papa foli për përvojën e tij dhe rikthimin gradual në detyrat papnore.

Papa Leon falënderoi mjekët për kujdesin e treguar dhe të gjithë ata që u lutën për shërimin e tij, duke theksuar se përvoja personale me sëmundjen e ka afruar më shumë me njerëzit që vuajnë dhe përballen me momente dobësie. “Kjo përvojë më ka dhënë një ndjenjë të thellë afërsie me të gjithë ata që po kalojnë sëmundje ose një gjendje dobësie. Tani që kjo fazë delikate ka kaluar, unë do të rifilloj gradualisht aktivitetet e mia, gjithmonë me ndihmën e Zotit dhe lutjet tuaja” tha ai.

Në vijim, Papa Leon nënvizoi se besimi i vërtetë kërkon sinqeritet dhe se fjalët duhet të shoqërohen nga qëllime të mira dhe vepra konkrete. “Pikërisht kjo do të thotë ‘t’i japësh Cezarit gjërat e Cezarit dhe Perëndisë gjërat e Perëndisë’: të jesh i sinqertë, i lirë nga frika skllavërore ose hipokrizia, i lirë të bësh mirë”, u shpreh ai.

Me këtë mesazh, Papa Leon XIV ftoi besimtarët të reflektojnë mbi përgjegjësitë e tyre dhe të dëshmojnë përmes veprave sinqeritetin, drejtësinë dhe dashurinë për të tjerët.