Qindra të rinj mblidhen në Sheshin Skënderbej për të protestuar kundër qeverisë

Qindra të rinj janë mbledhur në Sheshin Skënderbej, duke vazhduar protestën kundër qeverisë së Edi Rame, pavarësisht përplasjeve të forta me policinë dhe ndërhyrjeve me gaz dhe ujëhedhës gjatë ditës. Grumbullimi vjen në një kohë kur tensionet nuk janë ndërprerë në kryeqytet. Forcat e rendit kanë ndjekur protestuesit nëpër rrugë dhe lagje, ndërsa turma është zhvendosur disa herë, nga Bulevardi "Dëshmorët e Kombit" drejt Rrugës së Durrësit, Bulevardit "Zogu i Parë" dhe Unazës.

Megjithatë, ndërhyrjet policore nuk i kanë penguar qindra të rinj të mblidhen sërish në zemër të Tiranës. Prania e tyre në Sheshin Skënderbej vjen pas rigrumbullimit të demonstruesve pranë hyrjes së Pedonales dhe Parkut Rinia.

Gjatë orëve të fundit, përplasje të ashpra janë regjistruar përpara Ministrisë së Brendshme dhe të Blloku i Ministrive, ku protestuesit kanë hedhur koktej Molotov, gurë dhe mjete tymuese në drejtim të policisë. Forcat e rendit janë përgjigjur me gaz lotsjellës, ndërsa më herët kanë përdorur edhe tre automjete ujëhedhëse për të shpërndarë turmën.

Ndërsa në disa pikë të qendrës kanë vijuar konfrontimet, qindra të rinj kanë zgjedhur të qëndrojnë në Sheshin Skënderbej, duke mbajtur aktive protestën dhe kërkesën për dorëheqjen e kryeministrit.