Komuniteti Mysliman bën thirrje për dialog dhe vetëpërmbajtje

Komuniteti Mysliman i Shqipërisë (KMSH) shprehu të dielën shqetësimin për përshkallëzimin e tensioneve gjatë protestave kundër qeverisë së kryeministrit Edi Rama, duke u bërë thirrje institucioneve të dëgjojnë kërkesat e qytetarëve dhe të gjitha palëve të tregojnë vetëpërmbajtje. Në një deklaratë publike, KMSH theksoi se e drejta për të protestuar, për të shprehur pakënaqësitë dhe për të kërkuar llogaridhënie është pjesë e rëndësishme e jetës demokratike, por paralajmëroi se dhuna dhe gjuha nxitëse rrezikojnë paqen sociale. “U bëjmë thirrje institucioneve t’u përgjigjen me seriozitet kërkesave të qytetarëve dhe të gjitha palëve të tregojnë vetëpërmbajtje, maturi dhe përgjegjësi”, thuhet në deklaratë. Reagimi vjen në ditën e gjashtë të protestave studentore dhe qytetare, të cilat janë shoqëruar me përplasje të dhunshme mes demonstruesve dhe policisë, qindra të lënduar dhe dëmtime të pronës publike e private. Komuniteti Mysliman kërkoi që mosmarrëveshjet të zgjidhen përmes dialogut dhe respektimit të ligjit, duke theksuar se dallimet politike nuk duhet të shndërrohen në përçarje shoqërore. “Shqipëria është shtëpia e përbashkët e të gjithëve. Dallimet në qëndrime dhe bindje nuk duhet të na largojnë nga njëri-tjetri”, theksoi institucioni fetar. KMSH u bëri gjithashtu thirrje drejtuesve të vendit dhe qytetarëve të vendosin dinjitetin njerëzor, sigurinë dhe interesin e përbashkët mbi përplasjet politike. Deklarata i shtohet reagimeve të organizatave të shoqërisë civile dhe institucioneve fetare, të cilat kanë kërkuar ndalimin e dhunës, respektimin e së drejtës për protestë paqësore dhe hapjen e dialogut për zgjidhjen e krizës. “Dialogu është më frytdhënës se përplasja”, përfundon deklarata e Komunitetit Mysliman të Shqipërisë.