"Policia e mbushi selinë me gaz, ndërhyrja ishte skenar i përgatitur"

Pasi policia hodhi sasi të mëdha gazi lotsjellës në oborrin e selisë së Partisë Demokratike në Tiranë, përfaqësuesit e partisë kanë reaguar me forca. Eno Bozdo dhe Belind Këlliçi kanë akuzuar policinë për përdorimin e gazit lotsjellës pa asnjë provokim nga personat që ndodheshin në seli.

"Këtu mund të shihni dhjetëra bombula gazi, pa pasur asnjë incident. Nuk kishte asnjë provokim. Kishte vetëm një tentativë për të barazuar ngjarjen që ndodhi sot në selinë e PS. Ishte një skenar i Edi Rames, e kemi paralajmëruar. Ishin vetëm policët që kanë tentuar të dhunojnë selinë e PD-së", deklaroi Këlliçi.

Akuza e tij i referohet dy sulmeve që u regjistruan gjatë së dielës ndaj selisë së Partisë Socialiste. Në incidentin e parë, persona që dolën nga godina me shkopinj druri u përballën me protestuesit, ndërsa më vonë demonstruesit u rikthyen dhe hodhën gurë dhe koktej Molotov drejt selisë socialiste.

Sipas Këlliçit, ndërhyrja e policisë te selia e PD-së kishte për qëllim të krijonte një situatë të ngjashme edhe pranë godinës së opozitës. Ky është pretendimi i përfaqësuesit demokrat për motivin e ndërhyrjes.

Edhe Eno Bozdo deklaroi përdorimin e gazit lotsjellës, duke thënë se efektet e tij nuk u kufizuan në oborr, por përfshinin edhe ambientet e brendshme të selisë.

"Kanë helmuar njerëzit të gjithë brenda. Këta i kanë futur bombolat e gazit brenda PD-së. Kanë dhunuar gra dhe burra që ishin për qejfin e tyre brenda PD-së. O çuna, keni komandant ju këtu? Erdhën e na provokuan. Panë njerëz aty dhe mbushën oborrin dhe godinën e PD-së me gaz lotsjellës. Duhet të ikin, të zhduken", u shpreh Bozdo.

Deklaratat e dy përfaqësuesve të PD-së vijnë ndërsa protestat kundër qeverisë së Edi Rames kanë hyrë në ditën e gjashtë të përlasjeve. Gjatë së dielës, policia ka përdorur gaz lotsjellës dhe ujëhedhëse në disa zona të Tiranës, ndërsa protestuesit janë rigrupuar vazhdimisht, duke e zhvendosur marshimin nga qendra e kryeqytetit drejt rrugëve të tjera.

Ndërhyrja te selia e PD-së ka hapur kështu edhe një përplasje politike mbi veprimet e policisë. Bozdo dhe Këlliçi kërkojnë përgjegjësi për hedhjen e gazit lotsjellës në ambientet e partisë së tyre, ndërsa e lidhin incidentin me mënyrën se si qeveria po menaxhon protestat kundër saj.