RUMANIA RRËZOI DY DRONË TË DYSHUAR RUSË MBI DETIN E ZI

Ministri i Mbrojtjes, Radu Miruță, deklaroi të dielën se dronët fluturonin me shpejtësi rreth 450 kilometra në orë, të ngjashme me atë të avionëve luftarakë. Sipas tij, kjo shpejtësi ngre dyshime se bëhet fjalë për dronë rusë të tipit Geran-4, të pajisur me motor turboprop.

Sipas Ministrisë së Mbrojtjes, dy dronët hynë në ujërat territoriale rumune të shtunën, përkatësisht në orën 14:59 dhe 15:01 GMT. Ngjarja vjen vetëm pak ditë pasi dy cisterna kimikatesh u goditën nga dronë pranë bregdetit rumun të Detit të Zi.

Gjatë dy javëve të fundit, të paktë pesë anije të tjera mallrash janë goditur pranë brigjeve të Rumanisë dhe Bullgarisë fqinje. Si pasojë e këtyre incidenteve, 23 marinarë janë raportuar të vdekur ose të zhdukur. Shumica e sulmeve kanë ndodhur jashtë ujërave territoriale të vendeve anëtare të NATO-s.

Rumania, e cila është pjesë e NATO-s, ndan një kufi prej 614 kilometrash me Ukrainën, pjesa më e madhe e të cilit shtrihet përgjatë lumit Danub. Që prej nisjes së pushtimit të plotë rus të Ukrainës në vitin 2022, autoritetet rumune kanë raportuar vazhdimisht hyrje të dronëve rusë në hapësirën ajrore të vendit.

Një zyrtar i NATO-s deklaroi për agjencinë Reuters se aleanca është e gatshme të reagojë në çdo kohë ndaj çdo kërcënimi të mundshëm, me qëllim mbrojtjen e territorit dhe të qytetarëve të saj. Ndërkohë, ministrja e Jashtme e Rumanisë, Oana Țoiu, njoftoi se Këshilli i Atlantikut të Veriut do të mblidhet të martën për të diskutuar mbrojtjen dhe masat parandaluese në Detin e Zi.