Rama dhe Demo takim me strukturat e policisë, ministri: Kjo nuk është më protestë studentore!
Kryeministri Edi Rama dhe ministri Demo kanë zhvilluar një takim me drejtuesit e Policisë së Shtetit, pas protestave të dhunshme të një dite më parë, ku sipas shifrave të bërë publike nga ministri, mbeten të lënduar 295 persona, mes tyre 186 punonjës policie.
Gjatë takimit, ministri Demo deklaroi se ngjarjet e djeshme nuk mund të konsiderohen më pjesë e një proteste studentore, duke theksuar se dhuna ndaj forcave të rendit ka kaluar kufijtë e një tubimi protestues. "Dje është kaluar vija e kuqe. Nuk mund të quhet më proteste studentore, nuk mund të quhet më as proteste", deklaroi ministri. Sipas tij, bilanci i të lënduarve tregon edhe mënyrën se si ka vepruar Policia e Shtetit përballe protestuesve. "295 të lënduar, 186 prej tyre janë punonjës policie, raporti tregon vetëpërbajtjen e policisë", u shpreh Demo. Ministri e lidhi gjithashtu zhvillimin e protesteve me përfshirjen e politikës, duke akuzuar një parti të caktuar se u ka ofruar mbështetje protestuesve pas përplasjeve. "Protestuesit kanë gjetur azil politik në një parti të caktuar", deklaroi ai, pa e identifikuar partinë në pjesën e deklaratës së publikuar.