Arrestuar njëri prej dyshuarve për prodhimin dhe shitjen e narkotikave në Kurbin

Dy persona kanë përfunduar në prangat e policisë në Laç, pasi u kapën duke lëvizur me një automjet luksoz të blinduar, tip BMW. Njëri prej tyre rezultoi se kishte thyer masën e sigurisë "Arrest në shtëpi", ndërsa tjetrit iu gjetën lëndë narkotike dhe sende të tjera të kundërligjshme.

Policia arrestoi Elson Picakun, 35 vjeç, dhe Zef Kolndreun, 31 vjeç, të dy banues në Laç, gjatë operacionit të koduar "Blindi", të zhvilluar nga strukturat e hetimit të narkotikëve, në bashkëpunim me Forcen e Posaçme "Shqiponja" dhe Komisariatin e Kurbinit.

Në momentin e ndalimit, automjetin e blinduar e drejtonte Picaku. Nga verifikimet rezultoi se Gjykata e Apelit Tiranë kishte caktuar ndaj tij masën e sigurisë "Arrest në shtëpi" për veprën penale "Prodhimi dhe shitja e narkotikëve", masë të cilës 35-vjeçari nuk e kishte respektuar.

Ndërkohë, gjatë kontrollit fizik të pasagjerit Zef Kolndreu, efektivët gjetën një sasi lëndë të dyshuar narkotike kanabis. Kontrollat vijuan edhe në banesën e 31-vjeçarit, ku policia gjeti një jelek antiplumb dhe një armë të ftohtë, shpatë.

Policia sekuestroi automjetin BMW të blinduar, për të cilin dyshon se është siguruar me të ardhura nga burime të dyshimta, si dhe lëndën narkotike, jeleku antiplumb, shpatën dhe tre telefona celularë.

Hetuesit po verifikojnë origjinën e automjetit dhe veprimtaritë e dyshuara të dy të arrestuarve. Policia ia ka referuar materialet procedurale Prokurorisë për vijimin e hetimeve.