Franca shpall gjendje të jashtëzakonshme të pjesshme, masa të reja pas trazirave dhe plaçkitjeve

Kryeministri francez Sébastien Lecornu u ka kërkuar të hënën bashkive në vend të vendosin shtetrrethim të pjesshëm në zona të caktuara, pas incidenteve të dhunshme të regjistruara gjatë fundjavës. Ai paralajmëroi gjithashtu se, nëse situata e kërkon, mund të shpallë gjendjen e jashtëzakonshme.

Lecornu drejtoi më herët një takim ndërministror për menaxhimin e krizës, me qëllim vlerësimin e dëmeve dhe koordinimin e reagimit të autoriteteve ndaj trazirave.

“Ne nuk kemi asgjë për të fshehur. Forcat e rendit e kanë bërë mirë punën e tyre”, deklaroi kryeministri francez.

Ai i cilësoi ngjarjet si trazira të organizuara nga e majta ekstreme dhe elementë kriminalë, duke paralajmëruar ndjekje penale në shkallë të gjerë ndaj personave përgjegjës për aktet e dhunës.

Ndërkohë, në qytetin e Marsejës janë njoftuar kufizime për tubimet publike, nga ora 12:00 deri në orën 20:00, në një kohë kur pritej të zhvillohej një vizitë e ministrit të Brendshëm, Laurent Nuñez.

Më vonë u bë e ditur se vizita e ministrit në qytetin jugor francez ishte shtyrë.

Macron refuzon dorëheqjen e ministrit të Brendshëm

Ministri i Brendshëm, Laurent Nuñez, është përballur me kritika për mënyrën e menaxhimit të krizës dhe, sipas raportimeve, ka paraqitur dorëheqjen e tij.

Megjithatë, Presidenti francez Emmanuel Macron nuk e ka pranuar dorëheqjen, sipas njoftimit të bërë të hënën në mëngjes.

Autoritetet franceze po shqyrtojnë masa të mëtejshme për të rivendosur rendin dhe për të parandaluar përsëritjen e incidenteve të dhunshme në vend.