Efektivët hynë brenda Universitetit të Vlorës për të ndaluar pengesën mësimore
Shtetasit që pengonin procesin mësimor në Universitetin "Ismail Qemali" në Vlorë janë arrestuar dhe shoqëruar në ambientet e Policisë.
Gjashtë persona janë shoqëruar në ambientet e Policisë në Vlorë, pasi dyshohet se po pengonin zhvillimin normal të procesit mësimor në Fakultetin e Shkencave Kompjuterike të Universitetit “Ismail Qemali”. Sipas njoftimit të Policisë, ngjarja është raportuar rreth orës 11:51, kur administratori i universitetit ka njoftuar Sallën Operative të Drejtorisë Vendore të Policisë Vlorë për praninë e një grupi prej 30 deri në 40 personash, të moshave të ndryshme, në katin e parë të fakultetit.
Menjëherë pas marrjes së njoftimit, shërbimet e Policisë kanë shkuar në ambientet e fakultetit dhe kanë ndërhyrë për normalizimin e situatës, duke nxjerrë jashtë godinës personat që pengonin zhvillimin normal të procesit mësimor dhe studentët të ndiqnin leksionet në auditore.
Në vijim të veprimeve, janë shoqëruar në ambientet e Policisë 6 shtetas, të dyshuar si organizatorë të këtij grupimi. Policia vijon veprimet për dokumentimin e plotë të rrethanave të rastit.