Stilisti kosovar Etnik Shala shfaqet me uniformën e UÇK-së në Paris Fashion Week

Stilisti kosovar Etnik Shala ka sjellë historinë dhe identitetin shqiptar në një prej skenave të njohura të modeve botërore, Paris Fashion Week, duke prezantuar koleksionin e tij të ri "ARKA". Ai ka zgjedhur të shfaqej edhe me uniformën e UÇK-së, duke përcjellë një mesazh që shkon përtej modeve.

Koleksioni "ARKA" është ndërtuar rreth kujtesës, traditës dhe trashëgimisë që kalon nga një brez në tjetrin. Përmes veshjeve, detajeve dhe elementeve simbolike, Shala ka synuar të sjellë në vëmendje rrënjët shqiptare dhe historinë që familjet kanë ruajtur ndër vite.

Momenti më domethënës ishte paraqitja e vetë stilistit me uniformën e UÇK-së, një simbol i lidhur ngushtë me luftën e fundit në Kosovë. Përmes kësaj zgjedhjeje, ai e zhvendosi vëmendjen nga estetika e pasarelës te kujtesa historike dhe përvojat njerëzore që mbartin këto simbole.

Në një prononcim për Prive, Etnik Shala shpjegoi arsyen që e shtyu ta përfshinte këto element në prezantimin e tij. "Kam dashur të prezantoj edhe diçka që ka qenë shumë e rëndësishme për ne si kosovarë gjatë luftës së fundit. Mendoj se uniforma ishte gjithashtu pjesë e ‘ARKA’s", u shpreh ai, duke shpjeguar se për shumë familje të vdekësve, uniforma mbetet një nga kujtimet e pakta materiale që kanë ruajtur njerëzit e tyre të dashur.

Kështu, prezantimi i ‘ARKA’s nuk u kufizua vetëm te modelet dhe tendencat e reja, por u kthye edhe në një mënyrë për të treguar një pjesë të historisë së Kosovës para publikut ndërkombëtar. Në këtë rast, veshjet shërben si një gjuhë për të përcjellë identitetin, kujtesën dhe lidhjen me të kaluarën.

Paris Fashion Week është një tjetër etapë në rrugëtimin ndërkombëtar të stilistit. Etnik Shala ka prezantuar më herët krijimet e tij edhe në Milano dhe Londër, ndërsa puna e tij është vlerësuar me çmime në aktivitete të ndryshme të industrisë së modeve.

Me koleksionin "ARKA", stilisti kosovar sjell në qendër të vëmendjes një ide të qartë: moda mund të jetë jo vetëm shprehje artistike, por edhe një mënyrë për të ruajtur dhe përcjellë historinë e një populli.