Kryeministri i Francës kërkon shtetrrethim në disa qytete pas trazirave

Kryeministri i Francës, Sébastien Lecornu, ka kërkuar vendosjen e shtetrrethimeve të pjesshme në disa qytete të vendit pas trazirave të fundjavës, të shoqëruar me dhunë, zjarrvënie dhe grabitje. Ai ka theksuar se për momentin nuk është e nevojshme të vendoset shtetrrethim në të gjithë Parisin, por paralajmëroi se shpallja e gjendjes së jashtëzakonshme mbetet një mundësi nëse situata e kërkon.

Lecornu ka thënë se është i vendosur të rikthejë rendin publik dhe ka dënuar grupet që kanë shfrytëzuar protestat për të kryer akte dhune dhe për të grabitur biznese. Autoritetet franceze raportojnë se gjatë trazirave janë dëmtuar ose plaçkitur të paktën 3 mijë biznese, ndërsa rreth 2,400 persona janë arrestuar.

Dhuna shpërtheu pas javësh protestash të udhëhequra nga studentët, të lidhura me shqetësimet për rritjen e kostos së jetesës dhe kushtet në shkolla. Në disa qytete, përfshirë Parisin, Lionin dhe Marsejën, protestat u shoqëruan me përplasje me policinë, dëmtime të ndërtesave publike dhe grabitje dyqanesh. Në qytetin e Limoges, zjarri përfshiu godinën historike të bashkisë.

Ministri i Brendshëm, Laurent Nuñez, ofroi dorëheqjen pas kritikave për mënyrën se si autoritetet e parashikuan dhe menaxhuan dhunën, por presidenti Emmanuel Macron nuk e pranoi atë. Macron kërkoi gjithashtu një shqyrtim të mangësive në mbledhjen e informacionit dhe në planifikimin e operacioneve policore.

Autoritetet kanë paralajmëruar se do të marrin masa për të parandaluar përsëritjen e trazirave, ndërsa kryetarët e bashkive në qytetet më të prekura kanë kërkuar shpjegime nga qeveria për reagimin e forcave të sigurisë.