Tritol në makinën e kryetarit të Njësisë Administrative Shushicë, dy persona arrestohen
Dy persona, të cilët dyshohen se janë nga Tirana, janë arrestuar në Vlorë, pasi në makinën e kryetarit të Njësisë Administrative Shushicë u gjet një sasi e dyshuar lëndë plasëse, tritol.
Policia e Vlorës ka zhvilluar një aksion në lidhje me ngjarjen e së hënës, ku automjetit të kryetarit të Njësisë Administrative Shushicë, Igli Bimaj, iu vendos një sasi e dyshuar lënde plasëse, tritol. Gjatë operacionit, 4 persona u shoqëruan, ndërsa dy prej tyre u vunë në pranga. Të ndaluarit dhe të arrestuarit dyshohen se janë nga Tirana.
Në kuadër të veprimeve hetimore, policia ka bllokuar edhe një automjet, i cili mund të ndihmojë në zbardhjen e rrethanave të ngjarjes. Një burim nga grupi hetimor bëri me dije se shtetasit nga Tirana kishin mbërritur në Vlorë. Policia vazhdon të heton për të zbardhur plotësisht ngjarjen dhe për të përcaktuar rolin e personave të shoqëruar në vendosjen e lëndës plasëse.