Dhuna në Tiranë/ 271 të arrestuar në 7 ditë, 51 me precedentë penalë
Në Tiranë, në 7 ditët e fundit, 271 persona janë arrestuar për shkak të dhunës dhe protestave të zhvilluara në qytet. Nga ata, 51 kanë precedentë penalë në fusha të ndryshme, duke përfshirë vrasjen, plagosjen dhe armëmbajtjen pa leje.
Në vijim të veprimeve hetimore dhe procedurale të kryera nga strukturat e Drejtorisë Vendore të Policisë Tiranë, në lidhje me tubimin e zhvilluar dje, u arrestuan në flagrancë 33 shtetas, ndërsa 41 shtetas u proceduan penalisht. Këta shtetas dyshohet se kanë qëlluar me gurë dhe me sende të tjera të forta në drejtim të punonjësve dhe automjeteve të Policisë, si dhe kanë dëmtuar me sende të forta dhe me zjarr koshat e mbeturinave dhe tabelat e sinjalistikës rrugore. Si pasojë e sulmit dhe dhunës, janë dëmtuar 7 punonjës policie. Gjatë 7 ditëve të protestave të dhunshme, janë arrestuar 271 shtetas, nga të cilët 51 me precedentë penalë në fushën e vrasjes, plagosjes, armëmbajtjes pa leje, prodhimit dhe shitjes së narkotikëve, prostitucionit, shtrëngimit me anë të kanosjes për dhënien e pasurisë, vjedhjes, mashtrimit, falsifikimit të dokumenteve, mbajtjes pa leje të armëve të ftohta, pjesëmarrjes në grumbullime të paligjshme, goditjes/kundërshtimit/mosbindjes ndaj punonjësve të Policisë, si dhe në fushën e mjedisit dhe të qarkullimit rrugor.