Ulliri, thatësira dhe zjarret ulin prodhimin në Fier
Vjelja e ullinjve në qarkun e Fierit është nisur më herët, por prodhimi pritet të jetë përgjysmuar krahasuar me vitin e kaluar.
Fermerët e qarkut të Fierit kanë nisur vjeljen e ullinjve, por këtë sezon prodhimi pritet të jetë përgjysmuar krahasuar me një vit më parë. Vjelja nisi me vonesë, pasi kultivuesit pritën reshjet e shiut me shpresën se fruti do të rigjenerohej. Megjithatë, dëmet nga temperaturat e larta dhe thatësira mbeten të konsiderueshme, ndërsa rënie e ndjeshme parashikohet edhe në prodhimin e vajit.
Fermerët thonë se ullinjtë janë tharë nga temperaturat e larta gjatë verës. Situata rëndohet edhe nga numri i ulët i rrënjëve të reja që hyjnë për herë të parë në prodhim, të cilat nuk arrijnë të kompensojnë humbjet nga pemët e djegura dhe dëmet e shkaktuara nga thatësira.
Zjarret dogjën sipas drejtorisë së bujqësisë 300 mijë rrënjë ullinj në Mallakastër, Fier dhe Patos. Varietetet që nisin të parët prodhimin, janë frantoi dhe korronek, kurse vjelja për ullirin kaniniot nis në fund të tetorit. Vitin e kaluar në qarkun e Fierit kishte 2 milion e 47 mijë e 972 rrënjë ulliri. Nga këto, gjysma ishin në Fier dhe Mallakastër zonat që u prekën më së shumti nga zjarret.