Dani Alves: "Futbolli nuk shpëton askënd, partneri im më i mirë është Krishti"

Dani Alves ka bërë një paraqitje të surprizë në qytetin e Saltës, Argjentinë, ku mori pjesë në një aktivitet bamirësie dhe foli për besimin, Lionel Messin dhe misionin e tij të ri si pastor ungjillor. Ish-mbrojtësi brazilian, i njohur për karrierën e tij të gjatë në Barcelonë, tashmë po i kushton një pjesë të rëndësishme të jetës së tij predikimit të krishterë.

Gjatë aktivitetit në kompleksin sportiv Nicolás Vitale, ku u zhvillua një ndeshje bamirësie mes Auri FC dhe UNL, Alves foli edhe për futbollin dhe rolin që ai ka në shoqëri. "Kam ardhur për t'i shpallur Krishtin të gjithë Argjentinës. Edhe pse është një vend i çmendur pas futbollit, besoj se ka ardhur koha për të ndryshuar drejtim, sepse futbolli nuk shpëton askënd. Misioni yni është i panegociueshëm", deklaroi ai.

I pyetur për Lionel Messin dhe të ardhmen e yllit argjentinas me kombëtaren, Alves vlerësoi kontributin e tij, duke theksuar se sipas mendimit të tij, Messi nuk është trajtuar gjithmonë me respektin që meritonte në vendin e tij. Braziliani foli gjithashtu për lidhjet e vëçanta që ka krijuar gjatë karrierës me ish-shokët e skuadrës.

Kur iu kërkua të zgjidhte mes dyshes Messi-Jordi Alba dhe asaj Messi-Dani Alves, ish-mbrojtësi zgjodhi miqtë e tij. "Do të zgjidhja Jordi Albën dhe Messin, sepse janë miqtë e mi. Gjithmonë do të mbaj anën e miqve të mi. Partneriteti im më i mirë është me Krishtin", u shpreh ai.

Në fund, Alves iu drejtua të rinjve të pranishëm, duke i nxitur të mos heqin dorë nga ëndrrat dhe objektivat e tyre. "Dua të shfrytëzoj këto mundësitë për të bekuar jetën dhe ëndrrat tuaja. Ju të rinjve ju them: Zoti i bekoftë ëndrrat tuaja. Ecni përpara me zemra plot shpresë dhe arrini qëllimet tuaja", ishte mesazhi i brazilianit.

Kështu, në një aktivitet ku futbolli u përdor për të mbështetur një kauzë bamirësie, Dani Alves zgjodhi të vendoste në qendër të fjalës së tij besimin dhe mesazhin shpirtëror, duke treguar një anë tjetër të jetës së tij pas karrierës si futbollist.