Gjykata e Lartë shtyn seancat gjyqësore pas dëmeve në Tiranë

Gjykata e Lartë ka njoftuar shtyrjen e seancave gjyqësore, me përjashtim të çështjeve urgjente, pas dëmeve materiale dhe dëmtimit të dosjeve gjyqësore nga zjarri i shkaktuar gjatë protestave më 17 tetor. Dëmet e shkaktuara në ambientet dhe infrastrukturën e gjykatës kanë ndikuar në zhvillimin normal të veprimtarisë gjyqësore. Seancat do të mbeten të shtyra deri në përfundimin e verifikimit të dëmeve, vlerësimit të gjendjes së dosjeve gjyqësore dhe rikthimit të kushteve të nevojshme për vijimin e punës. Gjykata bën me dije se palët e prekura nga kjo situatë do të njoftohen individualisht përmes të dhënave të kontaktit, ndërsa datat e reja të seancave do të publikohen në faqen zyrtare dhe kanalet e tjera të komunikimit të institucionit.