Studentët refuzojnë dialogun me Rama, kryeministri këmbëngul: Jam në dispozicion

Kryeministrin Edi Rama duket se nuk e mban vendin. Pavarësisht protestave, trazirave dhe kërkesave të vazhdueshme të studentëve për dorëheqjen e tij, kreu i qeverisë ka reaguar sërish, këtë herë pas refuzimit të ftesës së tij për dialog.

Fillimisht, Rama u ofroi studentëve mundësinë e një takimi për të diskutuar kërkesat e tyre, por të rinjtë e refuzuan, duke këmbënguluar se nuk pranojnë bisedime në kushtet aktuale dhe se kërkesa e tyre mbetet largimi i kryeministrit nga detyra.

Pas këtij qëndrimit, Rama ka bërë një tjetër reagim publik, duke përsëritur gatishmërinë për dialog dhe duke komentuar thirrjet e protestuesve. “Tani kush do dialog unë jam në dispozicion se bashku me qeverinë. Dorëheqje, poshtë diktatura, poshtë komunizmi, s’duam dialog. Deri tani këto janë idetë e pedagogëve dhe të intelektualëve që janë mbledhur këtu poshtë”, tha Rama.

Ndërkohë, studentët janë përgjigjur ftesës së kryeministrit edhe përmes veprimeve simbolike. Në muret pranë godinës së Kryeministrisë janë vendosur fotografi të të rinjve, sipas protestuesve, që janë dhunuar gjatë tubimeve të ditëve të fundit. Poshtë tyre është shkruar pyetja “Dialog?”, përmes së cilës të rinjtë kanë shprehur kundërshtimin ndaj propozimit të Ramës, ndërsa vijonin të denoncojnë dhunën e ushtruar ndaj tyre.

Në mbështetje të studentëve kanë dalë edhe pedagogët, të cilët kanë zhvilluar një marshim në kryeqytet, duke kundërshtuar dhunën e raportuar gjatë protestave.

Prej tetë ditësh, tubimet janë shoqëruar me tensione, përplasje me forcat e rendit, dëmtime të pronës publike e private dhe arrestime. Krahas dorëheqjes së kryeministrit, protestuesit kanë kërkuar edhe lirimin e të rinjve të ndaluar.

Një tjetër episod është regjistruar paraditen e sotme përpara Kryeministrisë, ku ishin vendosur disa karrige me letra të bardha, mbi të cilat shkruhej “Dialog”, si një ftesë simbolike për bisedime me studentët.

Megjithatë, gjatë protestës, të rinjtë i hoqën karriget e vendosura përpara godinës së qeverisë, duke shprehur edhe në këtë mënyrë refuzimin e propozimit të kryeministrit.

Pavarësisht përpjekjeve të Ramës për të hapur dialogun, studentët dhe pedagogët kanë bërë qartë se nuk pranojnë bisedime në këto kushte dhe se do të vijojnë protestat.

Kërkesa e tyre mbetet e pandryshuar: dorëheqja e Edi Ramës dhe largimi i tij nga drejtimi i qeverisë.

Media që s’e dorëzon pavarësine e saj, i paraprine një qeverisje te ndershme. Pamfleti është një platformë mediatike analitike që u “lind” si domosdoshmëri e një tribune pa kompromis, si një zë i fuqishëm në luftën pa ekuivok ndaj krimit dhe korrupsionit politik në Shqipëri.