"Berisha thirr qytetarët për të bashkuar studentët në protestë: Të gjithë nesër përpara Universitetit"

Kryetari i Partisë Demokratike, Sali Berisha, u ka bërë thirrje qytetarëve që t’i bashkohen protestës së nesërme, në orën 10:00, përpara Universitetit. Në një videomesazh, Berisha akuzoi qeverinë për dhunën ndaj studentëve dhe të rinjve, duke deklaruar se ata “u ngritën si feniksi nga hiri”. Ai kërkoi qytetarët të mos i lënë vetëm në protestën e tyre. Berisha deklaroi se prej një jave, Tirana po përjeton terrorin e kuq që Shqipëria nuk e kishte parë që nga ditët e zeza të regjimit komunist. Ai tha se mbi 2 mijë vajza, djem, gjimnazistë, të mitur, studentë, janë dhunuar egërsisht, ndaluar apo arrestuar dhe kanë mbushur paraburgimet e vendit. Berisha akuzoi Edi Ramën për të shpëtuar lëkurën e tij dhe shpalli platformën kriminale të terrorit të kuq. Ai tha se protesta e sotme e mijëra asistentëve, pedagogëve dhe profesorëve të universiteteve në mbështetje të studentëve të tyre, përmbysi platformën e terrorit të kuq të Edi Ramës. Berisha tha se çdo qytetar shqiptar duhet të kuptojë se sot ka një përgjegjësi dhe që studentët, gjimnazistët, të rinjtë janë ngritur si feniksi nga hiri. Ai ftoi çdo qytetar të vrasë frikën dhe të zbresë së bashku me studentët në sheshin e mejdanit.