Zelensky takohet me Witkoff në Norvegji, ndërmjetësojnë aleatët evropianë: Synojmë paqe të qëndrueshme!

Presidenti ukrainas Volodymyr Zelensky ka takuar në Oslo me të dërguarin e presidentit amerikan Donald Trump, Steve Witkoff, në një moment kur marrëdhëniet mes Kievit dhe Washingtonit janë përkeqësuar ndjeshëm. Takimi vjen në një kohë kur tensionet mes dy vendeve janë thelluar për shkak të mosmarrëveshjeve lidhur me shkëmbimin e informacioneve të inteligjencës.

Sipas kryeministrit norvegjez, Zelensky kishte kërkuar nga Norvegjia dhe Finlanda të ndihmonin në organizimin e bisedimeve me Shtetet e Bashkuara dhe aleatët evropianë, në përpjekje për të kapërçyer mosmarrëveshjet dhe për të dhënë një shtysë të re procesit diplomatik.

Përpara takimit me Witkoff, presidenti ukrainas zhvilloi bisedime me kryeministrin norvegjez Jonas Gahr Støre dhe presidentin finlandez Alexander Stubb. Në diskutimet me të dërguarin amerikan mori pjesë përmes një lidhjeje me video edhe Jared Kushner, dëndri i Donald Trump.

Kryeministri norvegjez theksoi se qëllimi i këtyre kontakteve është orientimi i marrëdhënieve drejt një bashkëpunimi më konstruktiv dhe përfundimi i luftës përmes diplomacisë, duke synuar një paqe të drejte dhe të qëndrueshme.

Deri më tani, sipas informacioneve të raportuara, nuk ka pasur një reagim publik nga Witkoff apo vetë Zelensky lidhur me rezultatet e takimit.

Përplasjet mes Kievit dhe Washingtonit janë thelluar gjatë javëve të fundit, ndërsa presidenti amerikan Donald Trump ka shtuar kritikat ndaj homologut të tij ukrainas. Trump ka deklaruar se Ukraina duhet të ketë një president të ri, duke pretenduar gjithashtu se Zelensky nuk ka qenë asnjëherë realisht i interesuar për të dhënë fund luftës.

Këto deklarata kanë nxjerrë në pah mosmarrëveshjet mes dy vendeve për mënyrën se si duhet të arrihet një marrëveshje paqeje dhe për kushtet që duhet të përfshijë ajo.

Në këtë klimë të tensioneve, bisedimet në Oslo përbejnë një përpjekje të re diplomatike për të afruar qëndrimet mes Kievit dhe Washingtonit, me ndërmjetësimin e aleatëve evropianë. Megjithatë, mbetet e paqartë nëse takimi mes Zelenskyt dhe përfaqësuesve amerikanë do të sjellë një ndryshim konkret në marrëdhëniet mes dy vendeve apo përparim në negociatat për përfundimin e luftës në Ukrainë.