Zelensky kërkon takim trepalësh me Trumpin dhe Putinin për të dhënë fund luftës

Presidenti ukrainas Volodymyr Zelensky ka bërë thirrje për një takim trepalësh me presidentin amerikan Donald Trump dhe presidentin rus Vladimir Putin për të dhënë fund luftës në Ukrainë. Ai deklaroi se është i gatshëm të negociojë për një zgjidhje paqësore, pas bisedimeve me të dërguarin special amerikan Steve Witkoff në Oslo.

Zelensky tha se Ukraina e kishte mbështetur menjëherë propozimin amerikan për një armëpushim në sektorin energjetik, por sipas tij, Rusia iu përgjigj duke vazhduar sulmet. Ai kërkoi që përfaqësit amerikanë të përcjellin Moskës idetë e diskutuara për një zgjidhje paqësore, ndërsa shtoi se Witkoff pritej të udhëtojë drejt Rusisë për të zhvilluar bisedime të mëtejshme.

Thirrja e presidentit ukrainas vjen në një kohë të tensionesh të shtuar me Trumpin, i cili ka kritikuar ashpër mënyrën se si Zelensky po e trajton luftën dhe ka sugjeruar që dikush tjetër të negociojë në emër të Ukrainës. Presidenti amerikan pretendon se Kievi mund të kishte arritur një marrëveshje më të favorshme nëse do të kishte ndjekur këshillat e tij.

Trump ka shprehur gjithashtu gatishmërinë për të u takuar me Putinin dhe presidentin kinez Xi Jinping për të diskutuar përfundimin e luftës, edhe nëse Zelensky nuk është i pranishëm. Ai ka përmendur mundësinë e një takimi me liderin rus gjatë udhëtimit të planifikuar në Kinë në nëntor, duke theksuar se ndër temat e diskutimit mund të jetë edhe denuklearizimi.

Ndërkohë, Trump ka pretenduar se Shtetet e Bashkuara i kanë dhënë Ukrainës qindra miliarda dollarë ndihmë, pa marrë në këmbim atë që ai e konsideron të nevojshme. Deklaratat e tij dhe thirrja e Zelensky për negociata drejtpërdrejta vijnë mes përpjekjeve diplomatike për të gjetur një rrugë drejt përfundimit të konfliktit, ndërsa sulmet ruse vazhdojnë.