Senatorët amerikanë kërkojnë zgjedhje të lira në Serbi

Një grup dypartiak senatorësh amerikanë ka bërë thirrje për zgjedhje të lira në Serbi, duke vlerësuar se raportet për përgjime të paligjshme të anëtarëve të opozitës dhe përpjekjet për të diskredituar dhe minuar misionet vëzhguese të zgjedhjeve janë shqetësuese. Ata theksuan se autoritetet serbe duhet të sigurojnë kushte të barabarta për të gjitha partitë dhe qasje të hapur në vendvotime për të gjithë qytetarët.

Senatorët republikanë dhe demokratë kanë deklaruar se vëzhguesit e pavarur të zgjedhjeve shprehin shqetësim se ato do të mbahen në një mjedis armiqësor për shoqërinë civile, vëzhguesit dhe partitë opozitare. Ata vlerësuan se shkeljet serioze të integritetit të procesit të zgjedhjeve të mëparshme parlamentare të vitit 2022 janë konstatuar nga vëzhguesit serbë dhe ata ndërkombëtarë të zgjedhjeve.

Deklarata u publikua nga senatorët republikanë Roger Wicker, Chuck Grassley, Joni Ernst dhe Thom Tillis dhe ata demokratë Jeanne Shaheen, Dick Durbin dhe Chris Murphy. Ata theksuan se SHBA-ja e ka mbështetur prej kohësh rrugën e Serbisë drejt integrimit euroatlantik dhe e ka njohur potencialin e saj për të kontribuar në stabilitetin e Ballkanit Perëndimor.

Demokracia e fortë në Serbi është thelbësore për arritjen e secilit prej këtyre synimeve, theksuan senatorët. Rikonfirmuan rolin thelbësor që vëzhguesit ndërkombëtarë dhe ata vëzhguesit vendorë në ruajtjen e besimit në procesin zgjedhor. Autoritetet serbe kanë përgjegjësinë të sigurojnë që të gjitha institucionet ta respektojnë rolin e vëzhguesve qytetarë, gazetarëve dhe kandidatëve për poste publike.