Rreth 1.3 mijë studentë të huaj në universitetet shqiptare, kryesojnë italianët dhe indianët

Rreth 1.3 mijë studentë të huaj studojnë në universitetet shqiptare, sipas të dhënave të Policisë së Shtetit për Monitor. Italianët dhe indianët janë të parët në këtë kategori, me 462 dhe 426 leje qëndrimi për qëllime studimi, përkatësisht.

Shtetasit italianë përbëjnë rreth 37% të totalit të lejeve të qëndrimit për qëllime studimi, ndërsa indianët përbëjnë rreth 34%. Së bashku, shtetasit italianë dhe indianë përbëjnë rreth 71% të të gjitha lejeve të qëndrimit për qëllime studimi në Shqipëri deri në qershor 2026.

Pas tyre renditen shtetasit turq, me 64 leje qëndrimi për studime, ose rreth 5.1% të totalit. Më pas vijnë shtetasit francezë me 28 leje, duke përbërë rreth 2.2% të totalit, ndërsa shtetasit e Maqedonisë së Veriut kanë 18 leje, ose rreth 1.4%.

Ndër shtetet me numër më të lartë të lejeve për studime renditen edhe Kirgistani me 13 leje, Gjermania me 12, Kazakistani me 10, Nigeria me 9, ndërsa Afganistani dhe Spanja kanë nga 8 leje secila. Polonia regjistron 6 leje, ndërsa Holanda dhe Kameruni kanë nga 5 leje. Rusia, Serbia, Libia dhe Palestina kanë nga 4 leje secila.

Me 3 leje qëndrimi për studime renditen Austria, Azerbajxhani, Bosnja-Hercegovina, Bullgaria, Kina, Anglia, Rumania, Siria dhe Ukraina. Ndërkohe, për shumë shtete evropiane, si Greqia, Belgjika, Suedia, Zvicra apo SHBA, kanë nga 2 leje secila.