Zelensky: Pa Ukrainën, SHBA, Kina dhe Rusia nuk mund të vendosin për fatin tonë

Presidenti i Ukrainës, Volodymyr Zelensky, ka hedhur poshtë pretendimet se vendi i tij po e humb luftën me Rusinë, duke theksuar se humbja e jetëve njerëzore mbetet një nga pasojat më të dhimbshme të konfliktit. “Ne nuk po e humbim këtë luftë, por po humbim njerëz”, ka deklaruar ai, duke nënvizuar se lufta po ua merr fëmijëve mundësinë për të pasur një fëmijëri dhe jetë normale. Lideri ukrainas ka theksuar se përfundimi i luftës sa më shpejt është i domosdoshëm, ndërsa ka shprehur shpresën se partnerët ndërkombëtarë, veçanërisht Shtetet e Bashkuara dhe vendet evropiane, do të vazhdojnë ta ndihmojnë Ukrainën. Zelensky ka bërë të ditur se ai ka diskutuar disa ide konkrete për arritjen e paqes me të dërguarin e presidentit amerikan, Donald Trump, Steve Witkoff. Një nga mundësitë është organizimi i një takimi trepalësh mes liderëve, me qëllim trajtimin e çështjeve që mund të zgjidhen vetëm në nivelin më të lartë politik. Zelensky ka bërë të ditur se Witkoff pritet të udhëtojë në Rusi, ku do të zhvillojë bisedime, ndërsa ka thënë se mbetet të shihet se çfarë qëndrimi do të mbajë presidenti rus, Vladimir Putin. Ai ka komentuar gjithashtu raportimet për bisedime të mundshme trepalëshe mes Shteteve të Bashkuara, Rusisë dhe Kinës, duke këmbëngulur se asnjë marrëveshje për të ardhmen e Ukrainës nuk mund të arrihet pa përfshirjen e saj. “Nuk mund të ketë asgjë për Ukrainën pa Ukrainën”, ka theksuar presidenti ukrainas.