Protesta për strehimin në Portugali, 55 të arrestuar dhe dy të plagosur gjatë ndërhyrjes së policisë

Mijëra qytetarë morën pjesë në demonstrata të reja për të drejtën e strehimit në Portugali, kryesisht në Lisbonë dhe Porto. Policja ndërhyri herët të martën për të larguar tendat e aktivistëve, duke raportuar 55 arrestime dhe dy të plagosur gjatë operacionit policor në Lisbonë. Aktivistët votuan duke ngritur duart për të rivendosur kampin në sheshin Rossio të kryeqytetit portugez për të vazhduar protestën e tyre. "Më detyruan të dal në rrugë për të bërtitur" dhe "Lisbona nuk është në shitje" shkruhej në disa nga pankartat që mbanin protestuesit. Në orët e para të së martës, policia ndërhyri për të shpërndarë kampet e aktivistëve në Lisbonë dhe Porto, duke hequr 228 tenda. Banorët në sheshin Rossio të kryeqytetit formuan një zinxhir njerëzor për të vonuar ndërhyrjen e policisë përpara se të shpërthenin përleshjet me forcat e rendit. Policia portugeze tha se "përdorimi i forcës" ishte "i justifikuar" dhe i kufizuar për shkak të refuzimit të protestuesve për t'u larguar nga zona pavarësisht urdhrave nga autoritetet. Ministria e Brendshme vlerësoi "profesionalizmin" e oficerëve, duke theksuar se i kishte dhënë përparësi dialogut deri në momentin e fundit. Presidenti portugez Antonio José Seguro ka bërë thirrje për një "marrëveshje të gjerë" midis partive për të miratuar "masa afatgjata" për të adresuar krizën e strehimit. Protestat synojnë të nxjerrin në pah krizën e strehimit në Portugali, e cila karakterizohet nga çmimet në rritje të pronave. Të frymëzuar nga kampet e ngritura në Spanjë, si ai në Puerta del Sol ikonë të Madridit, disa aktivistë synojnë të koordinojnë përpjekjet e tyre në të gjithë Gadishullin Iberik.