Witkoff mbërrin në Rusi për takimin me Putinin, në fokus propozimet për përfundimin e luftës në Ukrainë

I dërguari special i Shteteve të Bashkuara, Steve Witkoff, ka mbërritur në Rusi, ku pritet të zhvillojë një takim me presidentin rus Vladimir Putin për të diskutuar propozimet që synojnë t’i japin fund luftës mes Rusisë dhe Ukrainës, e cila vijon prej vitit 2022. Takimi vjen pas bisedimeve të zhvilluara në Oslo të Norvegjisë, ku Witkoff u takua me presidentin ukrainas Volodymyr Zelensky dhe presidentin finlandez Alexander Stubb. Një zyrtar amerikan i cilësoi diskutimet si “shumë produktive dhe konstruktive”, duke theksuar bashkëpunimin mes SHBA-së, Ukrainës dhe vendeve evropiane për hapat e ardhshëm drejt paqes.

Pas takimit në Oslo, Zelensky deklaroi se ndarja e inteligjencës amerikane me Ukrainën për paralajmërimin e sulmeve raketore ruse po funksionon tashmë. Ai shprehu mirënjohje për mbështetjen amerikane, duke theksuar rëndësinë e informacionit të hershëm për mbrojtjen e civilëve nga sulmet me raketa balistike.

Presidenti ukrainas tha gjithashtu se në bisedime u trajtuan garancitë e sigurisë për Ukrainën, furnizimi me sisteme mbrojtëse dhe mundësia e një armëpushimi në sektorin energjetik. Kievi është shprehur i gatshëm për negociata, por këmbëngul se Rusia duhet të tregojë vullnet për t’i dhënë fund konfliktit.

Nga ana tjetër, Moska ende nuk ka dhënë një reagim publik të presidentit Putin për zhvillimet e fundit. Ministri i Jashtëm rus, Sergei Lavrov, ka deklaruar më herët se Kremlini do të dëgjojë propozimet amerikane, por ka përjashtuar mundësinë e lëshimeve politike.

Procesi diplomatik zhvillohet në një kohë kur marrëdhëniet mes Uashingtonit dhe Kievit janë tensionuar. Presidenti amerikan Donald Trump ka ushtruar presion ndaj Ukrainës që të arrijë një marrëveshje, ndërsa ka vënë në pikëpyetje vazhdimin e udhëheqjes së Zelenskyt. Ndërkohë, disa udhëheqës evropianë kanë shprehur shqetësimin për qëndrimet e ndryshueshme të administratës amerikane ndaj luftës.

Presidenti finlandez Alexander Stubb tha se në Oslo ishte shënuar “përparim i vërtetë” në diskutimet për paqen, por paralajmëroi se procesi do të kërkojë durim. Kryeministri norvegjez Jonas Gahr Støre nënvizoi se Evropa duhet të jetë pjesë e çdo procesi negociues për përfundimin e luftës.

Ndërkohë, sulmet ruse ndaj Ukrainës vazhdojnë. Sipas autoriteteve ukrainase, sulmet e së martës shkaktuan të paktën 10 viktima në Kiev, rajonin e kryeqytetit, Donetsk dhe Dnipro. Dy persona të tjerë u vranë nga një sulm gjatë natës pranë Kharkivit.

Rusia nisi pushtimin në shkallë të plotë të Ukrainës në shkurt të vitit 2022 dhe aktualisht kontrollon rreth 20 për qind të territorit ukrainas. Takimi mes Witkoff dhe Putinit shihet si një tjetër përpjekje diplomatike për të gjetur një rrugë drejt përfundimit të luftës, por mbetet e paqartë nëse palët do të arrijnë një marrëveshje konkrete.