Zbulohen sende ndaluara në burgun e Shkodrës

Një celular dhe një karikues janë zbuluar gjatë një kontrolli në Institucionin e Ekzekutimit të Vendimeve Penale në Shkodër. Kontrolli u krye nga Agjencia e Mbikëqyrjes në Sistemin e Ekzekutimit të Vendimeve Penale (AMSEVP), në bashkëpunim me sektorin e policisë së institucionit, pas informacioneve të siguruara në rrugën operative.

Gjatë kontrollit, autoritetet gjetën një aparat celular në gjendje të ndezur dhe një karikues, të cilët i përkisnin paraburgosurit A. F. Për këtë rast, autoritetet do t'i referojnë materialet procedurale Prokurorisë së Shkodrës, për veprime të mëtejshme ligjore. I paraburgosuri dyshohet për veprën penale të futjes ose mbajtjes së sendeve të ndaluara në institucionet penitenciare.

“Nga Agjencia e Mbikëqyrjes në Sistemin e Ekzekutimit të Vendimeve Penale, në bashkëpunim me Sektorin e Policisë së IEVP Shkodër, në bazë të informacioneve të përfetuara në rrugën operative, është ushtruar kontroll për sende të ndaluara në IEVP Shkodër, ku është konstatuar 1 (një) aparat celular në gjendje të ndezur, si dhe 1 (një) karikues, të cilat i përkasin paraburgosurit shtetasit A. F. Materialet procedurale do dërgohen për veprime të mëtejshme në Prokurorinë Pranë Gjykatës së Shkallës së Pare të Juridiksionit të Përgjithshëm Shkodër në ngarkim të tij paraburgosurit shtetasit A. F. për veprën penale “Futja ose mbajtja e sendeve të ndaluara në institucionin e ekzekutimit të vendimeve penale”, e parashikuar nga neni 324/a i Kodit Penal”, shkruan AMP.