Avokati i Popullit: 6 ankesa për dhunë, në Bllokun e Sigurisë edhe disa të mitur

Avokati i Popullit ka ngritur shqetësime për pretendimet e dhunës policore ndaj protestuesve të shoqëruar gjatë protestës së 20 tetorit në Tiranë, si dhe për kushtet e mbajtjes së tyre në ambientet e policisë.

Në raportin paraprak të monitorimit, institucioni evidenton mbipopullimin në Bllokun e Sigurisë, ku u konstatuan 118 persona, ndonëse kapaciteti zyrtar është 67, si dhe praninë e gjashtë të miturve.

Avokati i Popullit kërkon nga institucionet përgjegjëse ruajtjen e pamjeve filmike, verifikimin e pretendimeve për përdorim të tepruar të forcës dhe respektimin e garancive ligjore për personat e shoqëruar dhe të arrestuar.

Gjatë ditës së 20 tetorit, ekipe të Avokatit të Popullit kanë inspektuar Komisariatin e Policisë nr. 2, Bllokun e Sigurisë dhe Spitalin e Traumës. Komisariatet nr. 1, 5 dhe 6 nuk kishin persona të shoqëruar gjatë inspektimit, dhe për këtë arsye nuk janë pjesë e këtij monitorimi.

Në Bllokun e Sigurisë u pretendua dhunë gjatë ndalimit ose shoqërimit. Në një rast u raportua dëmtim në kokë, dhe në një tjetër dëmtim i syrit. Pamjet filmike të publikuara nga protesta ngrenë shqetësime për tërheqje zvarrë dhe goditje me shkopinj gome. Qytetarët na kanë dërguar pamje filmike të dhunës së ushtruar nga policia gjatë ndalimit dhe shoqërimit. Ne po i analizojmë dhe po i hetojmë për të nxjerrë përgjegjësit. Gjithashtu, publiku na është drejtuar me ankesa përmes telefonit dhe na ka sinjalizuar raste të përdorimit të forcës, të cilat po analizohen.

Gjatë monitorimit morëm kontakt me 6 të mitur. Por në Bllokun e Sigurisë, ku mbahen, nuk arritëm të identifikojmë dhomë të veçantë për fëmijët. Ankesat e administruara lidheshin me kufizimet për kontaktin me familjen dhe avokatin, si dhe mungesën e psikologut gjatë marrjes në pyetje.

Avokati i Popullit do të vazhdojë të monitorojë zbatimin e këtyre kërkesave. Kur verifikohen përgjegjësitë, do të kërkojmë marrjen e masave ndaj punonjësve të policisë dhe do t’i referojmë në prokurori rastet kur konstatojmë shkelje të ligjit dhe përgjegjësi penale nga ana e tyre.