Rama: Shqipërisë i duhen miq, por jo vetëm me Izraelin

Kryeministri Edi Rama po zhvillon sot një takim me drejtuesit e bankave në godinën e Bankës së Shqipërisë, në një moment kur degët e ndryshme nëpër Tiranë kanë rënë pre e vandalizmit të protestave të dhunshme dhe kanë cenuar vijimin normal të punës. Në fjalën e tij, kreu i qeverisë u shpreh se ne jemi një vend mik i hebrenjve dhe i Izraelit, ashtu si me Katarin, Emiratat e Bashkuara që nuk kanë lidhje me Izraelin. Rama përmendi edhe marrëdhëniet e mira me Turqinë, e cila sipas tij nuk ka raporte të mira tani me Izraelin. “Dua të shpreh neverinë time për ata që i fryjnë zjarrit, ngatërrojnë gjëra që nuk duhet ngatërruar. Ne jemi një vend mik i hebrenjve, i Izraelit si dhe i Katarit, i Emirateve te Bashkuara që nuk kanë lidhje me Izraelin. Apo dhe me Turqinë. Ne kemi nevojë për miq. Kemi nevojë të vijnë njerëz që të jetojnë këtu, të sjellin para, dije, eksperiencë. Ne jemi një vend që zoti na i ka sjellë të gjithash, po robi nuk i ka lënë. Sa herë ngjitet, i vijnë sulme nga jashtë dhe nga brenda”, tha Rama.