Rusia niset me furnizime të naftës për në SHBA, pas marrëveshjes Trump-Putin
Rusia dhe Shtetet e Bashkuara janë në fazën përfundimtare të përgatitjes së kontratave për furnizimin me naftë, duke parë një cisternë të parë me 40,000 tonë naftë të nisur për në SHBA.
Zëvendëskryeministri rus, Alexander Novak, deklaroi se cisterna e parë është planifikuar të niset nga porti më 22 tetor, me destinacion Shtetet e Bashkuara. Ai theksoi se kjo dërgesë do të pasohet nga furnizime të tjera, në përputhje me kapacitetet prodhuese të Rusisë dhe nevojat e tregut amerikan.
Novak sqaroi se Moska nuk synon rikthimin e menjëhershëm të eksporteve në kapacitet të plotë, pasi vëllimet e furnizimit do të varen nga prodhimi i rafinerive ruse. Ai deklaroi se Rusia mund të arrijë kapacitetin e plotë të eksporteve deri në fund të vitit, ndërsa furnizimet për vendet e tjera do të përcaktohen nga sasitë që mbeten të disponueshme pas përmbushjes së nevojave amerikane.
Çështja e furnizimeve me naftë ishte diskutuar edhe gjatë një bisede telefonike mes presidentit amerikan Donald Trump dhe homologut rus Vladimir Putin, më 9 tetor. Sipas palës ruse, Moska ka shprehur gatishmërinë për të furnizuar me naftë dhe produkte të saj si tregun amerikan, ashtu edhe tregjet ndërkombëtare.
Novak ka deklaruar gjithashtu se Rusia synon të rrisë gradualisht eksportet, duke parashikuar furnizime prej 300 mijë tonësh gjatë tetorit, 500 mijë tonësh në nëntor dhe një milion tonësh në dhjetor. Objektivi afatgjatë i Moskës, sipas tij, është që eksportet të arrijnë gradualisht në tre milionë tonë në muaj.