BE-ja i kundërvënë paralajmërimeve ruse për Ballkanin Perëndimor

Bashkimi Evropian (BE) ka një përgjigje ndaj paralajmërimeve ruse për vendet e Ballkanit Perëndimor: e ardhmja e tyre është në BE. Ky është mesazhi që Brukseli përcjell pas deklaratës së zëdhënëses së Ministrisë së Jashtme ruse, Maria Zakharova. Ajo i kishte “paralajmëruar” vendet e rajonit se integrimi evropian nuk është më vetëm çështje anëtarësimi, por nënkupton edhe pranimin e politikës së Brukselit ndaj Moskës.

Pavarësisht ndikimit rus në disa pjesë të rajonit, shumica e vendeve të Ballkanit Perëndimor i kanë harmonizuar politikat e tyre të jashtme me ato të BE-së. Ndërkohë, Bashkimi Evropian mbetet partneri më i madh tregtar dhe strategjik i të gjitha vendeve të rajonit, përfshirë Bosnje e Hercegovinën dhe Serbinë.

Komisioni Evropian tha se “lufta kundër manipulimit të informacionit nga jashtë, dezinformimit dhe kërcënimeve të tjera hibride është pjesë përbërëse e procesit të anëtarësimit”. “Mbrojtja e procesit të integrimit evropian dhe e integritetit të mediave nga dezinformimi dhe manipulimi i informacionit nga jashtë është me rëndësi thelbësore”, thuhet në përgjigjen e Komisionit Evropian për Radion Evropa e Lirë (REL).

Teksa Brukseli thekson se Bashkimi Evropian është partneri kryesor politik, ekonomik dhe strategjik i Ballkanit Perëndimor, bashkëbiseduesit e Radios Evropa e Lirë vlerësojnë se Moska po e paraqet gjithnjë e më shpesh integrimin evropian si një zgjedhje mes afrimit me BE-në dhe ruajtjes së marrëdhënieve me Rusinë.