OSBE Dënon Sërish Dhunën në Protestë dhe Sulmet ndaj Gazetarëve, Thirrje të Fortë Gjithë Politikës: Gjeni Zgjidhje

Përfaqësuesi i OSBE-së, Claude Haagen, ka deklaruar se është thellësisht i shqetësuar për zhvillimet e fundit në Shqipëri. Ai ka theksuar rëndësinë e ruajtjes së rendit dhe respektimit të lirive themelore në një shoqëri demokratike. Haagen ka thënë se dhuna nuk mund të zëvendësojë dialogun dhe nuk ka vend në një shoqëri demokratike.

Ai ka theksuar se çdo akt dhune i kryer nga individë pjesëmarrës në protesta, si edhe çdo përdorim i tepruar i forcës nga autoritetet e rendit, duhet të hetohet dhe të trajtohet në përputhje me legjislacionin shqiptar dhe standardet ndërkombëtare për të drejtat e njeriut. Haagen ka bërë thirrje për përgjegjshmëri dhe respektim të parimeve demokratike nga të gjitha palët.

Një tjetër çështje e vënë në fokus nga përfaqësuesi i OSBE-së është siguria e gazetarëve dhe garantimi i lirisë së medias gjatë raportimit nga protestat. Haagen ka theksuar se gazetarët duhet të jenë në gjendje të raportojnë lirisht dhe në mënyrë të sigurt për ngjarjet publike, pa u përballur me intimidim, ngacmime apo pengesa të pajustifikuara.

Në përfundim të deklaratës, Haagen u drejtohet qeverisë, opozitës, organizatave të shoqërisë civile, studentëve dhe qytetarëve, duke i ftuar të angazhohen në një dialog konstruktiv për gjetjen e zgjidhjeve në interes të të gjithë shqiptarëve. Ai thekson se sundimi i ligjit, respektimi i lirive themelore dhe dialogu duhet të mbizotërojnë mbi përplasjet.