Eurodeputeti austriak kritikon Raman: Protestat janë pro-evropiane dhe nuk duhet të konsiderohen pengesë për anëtarësimin në BE
Eurodeputeti austriak dhe bashkëkryetari i Partisë së Gjelbër Evropiane, Thomas Waitz, ka kritikuar qëndrimin e kryeministrit Rama për reagimin ndaj protestuesve në Shqipëri. Ai ka deklaruar se protestat janë pro-evropiane dhe nuk duhet të konsiderohen pengesë për anëtarësimin në Bashkimin Evropian.
Eurodeputeti austriak dhe bashkëkryetari i Partisë së Gjelbër Evropiane, Thomas Waitz, ka reaguar lidhur me protestat e studentëve në Shqipëri, duke kritikuar qëndrimin e kryeministrit Rama. Në një mesazh të publikuar në rrjetet sociale, Waitz ka kundërshtuar deklaratat që i atribuon kryeministrit Rama, sipas të cilave protestat mund të cenojnë procesin e integrimit të Shqipërisë në Bashkimin Evropian.
Sipas eurodeputetit, protestat që kërkojnë luftimin e korrupsionit, përmirësimin e arsimit dhe mbrojtjen e mjedisit janë në përputhje me vlerat evropiane dhe nuk duhet të konsiderohen pengesë për anëtarësimin në BE. "Më lejoni ta sqaroj: Protesta për institucione që janë të aftë dhe të gatshëm të luftojnë korrupsionin është pro-evropiane. Protesta për një arsim cilësor është pro-evropiane. Dhe protesta për mbrojtjen e trashëgimisë natyrore të Shqipërisë është gjithashtu pro-evropiane", shprehet Waitz.
Eurodeputeti austriak ka kritikuar gjithashtu mënyrën se si autoritetet shqiptare kanë reaguar ndaj protestuesve, duke ngritur shqetësimet për përdorimin e gazit lotsjellës, ujëhedhëseve dhe ndalimin e të miturve. "Pas 13 vitesh në pushtet, Edi Rama u thotë protestuesve se ata janë 'ekstremistë në duar të huaja' dhe kërkon se do të anulojë bursat e arsimin falas. Ai po dërgon gaz lotsjellës, hedhëse uji dhe po ndalon të mitur. Kjo nuk është absolutisht në përputhje me vlerat evropiane", deklaron ai.
Waitz ka theksuar se rruga e Shqipërisë drejt Bashkimit Evropian duhet të mbështetet te respektimi i të drejtave të qytetarëve, forcimi i shtetit të së drejtës dhe garantimi i lirisë së protestës. "Të gjithë duam ta shohim Shqipërinë në Bashkimin Evropian si një shtet të së drejtës, si një shtet që respekton të drejtat e qytetarëve, që mbron zonat natyrore dhe që dëgjon qytetarët e saj dhe respekton të drejën e tyre për të demonstruar. Kjo është rruga evropiane dhe shpresojmë që Shqipëria ta bëjë veten gati për të", shprehet eurodeputeti.