Stuhitë dhe përmbytjet në Francë, tre viktima dhe qindra banorë të evakuuar

Të paktën tre persona kanë humbur jetën si pasojë e reshjeve intensive dhe stuhive të forta që përfshinë jugun e Francës. Përmbytjet kanë shkaktuar deme të mëdha në infrastrukturë, ndërprerje të furnizimit me energji elektrike, si dhe vështirësi në transport dhe telekomunikacion.

Autoritetet lokale në departamentin Bouches-du-Rhône, një ndër rajonet të goditura nga moti ekstrem, kanë konfirmuar bilancin e viktimave mbrëmjen e së martës, më 21 tetor 2026. Sipas gazetës franceze La Provence, e cila u referohet burimeve zyrtare, dy gra të moshave 86 dhe 26 vjeç u gjetën pa shenja jete në një bodrum në komunën Lançon-Provence. Dyshohet se ato u mbytën pasi ujërat e përmbytjes depërtuan në ambientin ku ndodheshin.

Viktima e tretë është një 75-vjeçar nga zona e Saint-Mitre-les-Remparts, i cili dyshohet se u mor nga rrjedha e forte e ujit. Trupi i pajetë i tij u zbulua më vonë në komunën fqinje të Istres.

Për shkak të situatës së krijuar, rreth 250 banorë janë detyruar të largohen nga shtëpitë e tyre dhe të strehohen përkohësisht në ambiente të përshtatura në zonat e Arles dhe Saint-Martin-de-Crau. Ndërkohë, autoritetet po monitorojnë zhvillimet dhe po vlerësojnë rreziqet e mëtejshme për popullsinë.

Reshjet e dendura të shiut, të shoqëruara me erëra të fuqishme, kanë dëmtuar rrugë dhe infrastrukturë, duke sjellë ndërprerje të qarkullimit hekurudhor në disa zona të prekura.

Vështirësi janë regjistruar edhe në Korsikë, ku përmbytjet kanë penguar lëvizjen e trenave në linjën Bastia-Corte. Gjithashtu, në aeroportin e Bastias janë raportuar anulime fluturimesh për shkak të kushteve të pafavorshme atmosferike.