Kongresmenja amerikane Ocasio-Cortez: Qeveria shqiptare të ulë tensionet dhe të respektojë të drejtat e qytetarëve

Kongresmenja amerikane Alexandria Ocasio-Cortez ka reaguar në lidhje me protestat e zhvilluara në Tiranë dhe raportimet për dhunën e ushtruar nga forcat e rendit ndaj protestuesve. Ajo ka bërë thirrje për qeverinë shqiptare të ulë tensionet dhe të respektojë të drejtat themelore të qytetarëve. Përfaqësuesja amerikane ka thënë se ka marrë mesazhe nga pjesëtarët e komunitetit shqiptar në Shtetet e Bashkuara, të cilët kanë shprehur shqetësimin për sigurinë e familjarëve të tyre në Shqipëri. Ajo ka kërkuar ndalimin e represionit të dhunshëm dhe garantimin e lirisë së shprehjes. Reagimi i kongresmenes amerikane vjen në një moment kur protestat e studentëve në kryeqytet kanë sjellë në qendër të debatit publik veprimet e Policisë së Shqipërisë dhe respektimin e të drejtave për protestë paqësore. Shqetësimi i shprehur nga pjesëtarët e diasporës shqiptare, sipas Ocasio-Cortez, lidhet drejtpërdrejt me sigurinë e familjarëve të tyre dhe zhvillimet e fundit në vend. Deklarata e saj i shtohet reagimeve për situatën e krijuar në Shqipëri, ndërsa protestuesit vijojnë të kërkojnë përgjegjësi politike dhe ndryshime lidhur me zhvillimet që kanë nxitur daljen e tyre në rrugë.