Qeveria propozon ndryshimin e mënyrës së administrimit dhe vënies në dispozicion të pronave shtetërore për investime

Qeveria propozon ndryshimin e mënyrës së administrimit dhe vënies në dispozicion të pronave shtetërore për investime, duke parashikuar pagesa të diferencuara sipas zonave dhe krijimin e një fondi të pasëmarrjes të pasurive publike. Projektligji i propozuar synon të zëvendësojë ligjin për investimet strategjike dhe atë për investimet e huaja.

Sipas nenit 14, territori do të klasifikohet në tri kategori: zona me potencial të lartë, të mesëm dhe të ulët zhvillimi. Klasifikimi do të miratohet nga Komiteti i Nxitjes së Investimeve, me propozim të Agjencisë Shqiptare të Zhvillimit të Investimeve (AIDA).

Në varësi të këtij klasifikimi, neni 16 parashikon vënien në dispozicion të pronave shtetërore kundrejt pagesave të përshkallëzuara: "Zona 1 në masën 100% të vlerës së percaktuar, Zona 2 në masën 50% të vlerës së percaktuar dhe Zona 3 kundrejt një tarife të reduktuar".

Vlera do të percaktohet sipas referencave ligjore, ndërsa metodologjia dhe kushtet e vënies në dispozicion të pronave do të miratohen me vendim të Këshillit të Ministrave. Projektligji nuk percakton shumën konkrete të tarifave të reduktuara për zonën e tretë.

Një tjetër ndryshim është krijimi i Fondit të Nxitjes së Investimeve, në të cilin do të përfshihen pasuri të paluajtshme shtetërore nga zonat me potencial zhvillimi. Neni 21 parashikon përfshirjen e pasurive shtetërore "të çdo kategorie dhe lloji", në administrim të institucioneve publike, të cilat mund të vihen në dispozicion të projekteve sipas legjislacionit në fuqi.

Projektligji percakton gjithashtu se "Legjislacioni sektorial për pasuritë shtetërore zbatohet për aq sa ky ligj nuk parashikon ndryshe". Një dispozitë tjetër u jep investitorëve privatë mundësinë të kërkojnë përdorimin e pronave shtetërore që kufizohen me pasuritë e tyre. Sipas nenit 15, kur prona shtetërore nevojitet për akses, lidhje infrastrukturore ose funksionimin e investimit, sipërfaqja e kërkuar nuk mund të tejkalojë 20% të pronës private. "Në këto raste, këto pasuri mund të vihen në dispozicion investitorit pa procedurë konkurruese", percakton neni, duke kërkuar certifikimin e statusit juridik nga Kadastra dhe pagesën e plotë të vlerës së pronës sipas metodologjisë përkatëse.