Vlora sërish nën ujë, furnizimi me ujë i ndërprerë
Vlora është përsëri nën ujë pas një shi i shkurtër, ndërsa furnizimi me ujë është ndërprerë për shkak të një avarie në rrjetin e furnizimit me ujë.
Pas përmbytjeve në orët e para të mëngjesit të shkaktuar nga shiu që ra për vetëm 30 minuta, qyteti bregdetar i Vlorës përballet me një tjetër problem, mungesën e furnizimit me ujë të pijshëm. Ujësjellësi ka njoftuar qytetarët se, për shkak të një avarie të rëndë në rrjetin e furnizimit me ujë, në lagjen “10 Korriku”, do të jetë i nevojshëm stakimi i detyruar i stacioneve të ujësjellësit. Për pasojë, është ndërprerë furnizimi me ujë në qytet deri në riparimin e plotë të avarisë.
Tubacionet kryesore në Vlorë janë të amortizuara. Sa herë që ka ndryshime të menjëhershme të prurjeve ose mbingarkesë të sistemit nga presioni i ujit, tubacionet shpërthejnë. Tubacioni ku u konstatua avaria ndodhet shumë pranë një banese private. Kjo jo vetëm që e bën ndërhyrjen e grupeve të punës të vështirë, por tregon edhe se si ndërtimet e viteve të fundit mbi brezat mbrojtës të tubacioneve përshpejtojnë dëmtimin e tyre.
Problemet për Vlorën nuk mbarojnë me kaq. Në zonat e Radhimës, Orikumit dhe deri pranë Jonufrës deti është ndotur me bidonë plastikë dhe mbetje të tjera si pasojë e reshjeve të shiut, ku lumenj e përrenj i transportojnë mbetjet deri në det. Përballë kësaj situate, mbetet e rëndësishme që institucionet përgjegjëse të marrin masa.