Protesta e studentëve në Tiranë: "Rama në burg, Berisha në burg" dhe policia rrethon Kryeministrinë

Studentët dhe qytetarët janë mbledhur në bulevardin "Deshmorët e Kombit" për të protestuar kundër qeverisë, ndërsa policia ka rrethuar Kryeministrinë me forca të FNSH-së dhe të njësisë "Shqiponja". Protesta është në vazhdim për të dhjetën ditë, me thirrjet "Rama në burg, Berisha në burg" dhe "Rama, jep dorëheqjen".

Situata është tensionuar pas shpërthimit të një kapsolle, e cila ka provokuar reagimin e forcave të rendit. Menjëherë pas shpërthimit, efektivët e policisë janë vënë në lëvizje përreth zonës ku po zhvillohet protesta.

Një grup adoleshentësh ka zhvendosur disa stola guri dhe i ka vendosur në njërin prej hyrjeve të Kryeministrisë, me synimin për të bllokuar kalimin e autobusëve të policisë që hedhin ujë me presion.

Policia ka angazhuar kryesisht efektivë të Forcave Kombëtare të Sigurisë dhe të njësisë "Shqiponja", ndërsa një automjet që hedh ujë me presion ka nisur të lëvizë, i shoqëruar nga disa forca të rendit.

Përmes megafonit, policia u ka bërë thirrje qytetarëve të mos provokojnë efektivët, të distancohen nga aktet e dhunës dhe të heqin maskat që mbajnë në fytyrë. Gjithashtu, u ka kërkuar protestuesve të largohen nga rruga dhe të lirojnë hapësirën për qarkullim.

Megjithatë, studentët dhe qytetarët vazhdojnë të qëndrojnë përreth bulevardit "Deshmorët e Kombit", ndërsa policia mbajnë të rrethuar godinën e qeverisë. Protesta e studentëve, të cilën e mbështesin edhe pedagogët, nisi rreth orës 10:00 përpara Kuvendit të Shqipërisë. Me pas, pjesëmarrësit marshuan nëpër rrugët e Tiranës, duke u zhvendosur drejt Kryeministrisë, ku kanë vazhduar tubimin.