TENSIONOHET PROTESTA PARA KRYEMINISTRES

Situata para Kryeministrisë së Shqipërisë është tensionuar pasi policia ka përdorur ujë me presion ndaj protestuesve që ndodheshin në bulevardin "Deshmoret e Kombit". Nderhyrja erdhi pasi një grup të rinjsh, kryesisht adoleshentë, qëlluan me gurë në drejtim të autobotit të blinduar që qëndronte pranë godinës së qeverisë. Por autoboti nuk e kufizoi ndërhyrjen vetëm ndaj personave që hodhën gurë. Ai drejtoi ujë me presion edhe ndaj protestuesve të tjerë që ndodheshin në bulevard, për të cilëve nuk raportohet ndonjë veprim i dhunshëm në momentin e ndërhyrjes. Policia u ka bërë thirrje qytetarëve të shmangin provokimet dhe të largohen nga trotuari pranë Kryeministrisë. Mbetet e paqartë nëse kjo ndërhyrje paralajmëron një tjetër përpjekje të policisë për shpërndarjen e protestuesve, si në ditët e mëparshme, apo nëse protesta do të vijojë pa ndërhyrje të tjera. Deri tani, policia nuk ka sqaruar nëse përdorimi i ujit me presion synonte vetëm ndalimin e personave që qëlluan me gurë apo largimin e protestuesve nga zona përpara Kryeministrisë.