"Rusia akuzohet për "përdorim të armëve në orbitë" ndaj një sateliti komercial"

Zyrtarët amerikanë akuzuan publikisht Rusinë se ka kërcënuar një satelit komercial, që operohet nga Finlanda dhe i cili ofron imazhe dhe informacione të inteligjencës për Ukrainën dhe vende të tjera, duke e cilësuar këto veprime si "qëllimisht të pamatur".

Në përgjigje të akuzave, te bëra gjatë një debati në Kombet e Bashkuara më 21 tetor, Rusia cilësoi pretendimet amerikane si "absurde" dhe e akuzoi Uashingtonin për "ambiciet e veta agresive ushtarake në hapësirë".

Shkëmbimi i akuzave ndodhi disa ditë pasi një satelit ushtarak rus, i njohur si Kosmos-2612, u afrua "në mënyrë të rrezikshme" satelitit ICEYE-X36, i cili është i regjistruar në Shtetet e Bashkuara dhe operohet nga kompania finlandeze ICEYE.

Sateliti rus u afrua "shumë" - sipas disa vlerësimeve deri në 200 metra - një distancë që zyrtarët e hapësirës dhe vëzhguesit amatorë të satelitëve e cilësuan si tejet të pazakontë.

"Ky nuk ishte një afrim rutinë apo një 'kalim pranë'", tha për Radiun Evrope të Lirë LeoLabs, një kompani e inteligjencës hapësinore. "Sjellja përkon me operacione të sofistikuara të takimit dhe afrimit në hapësirë".

ICEYE-X36 është i pajisur me teknologji radari që mundëson mbledhjen e imazheve të detajuara të sipërfaqes së Tokës, edhe nëse ka re. Në janar, kompania finlandeze nënshkroi një kontratë me Ministrinë e Mbrojtjes së Ukrainës për ofrimin e informacioneve të inteligjencës.

Sateliti Kosmos-2612 "shfaq sjellje kërcënuese duke manovruar qëllimshëm në mënyrë të rrezikshme pranë një sateliti komercial", tha Brian Hardesty, këshilltar i delegacionit amerikan në Konferencën për Çarmatimin, gjatë një takimi në Nju Jork të Komitetit të Përgjithshëm të OKB-së, organ ku diskutohen çështjet e kontrollit të armëve dhe çarmatimit.

"Ky veprim duket se përkon me një operacion të përdorimit të armëve në orbitë".

"Vendimi për të ndërmarrë këto veprime ishte qëllimisht i pamatur", tha ai.

Përfaqësuesi i Rusisë, identiteti i të cilit nuk mund të përcaktohej menjëherë, nuk iu përgjigj drejtpërdrejt këtij pretendimi.

"I bejmë thirrje shteteve anëtare që të kenë përgjigje të duhur ndaj ambiciave agresive ushtarake të Shteteve të Bashkuara në hapësirë", tha ai.

Ai iu referua po ashtu komenteve të bërë muajin e kaluar nga sekretari i Forcave Ajrore të SHBA-së, zyrtari më i lartë civil i kësaj dege ushtarake.

Komentet e Troy Meink, të bërë gjatë një konference në periferi të Uashingtonit, se SHBA-ja vëçse ka vendosur armë në hapësirë - "armë të kontrollit të hapësirës në orbitë, të afta për të mbrojtur Forcat e Përbashkuara nga veprimet armiqësore të kundërshtarëve" - shkaktuan habinë në mesin e ekspertëve të politikave.

Megjithatë, vëzhgues të tjerë që e ndjekin që një kohë të gjatë veprimtarinë në hapësirë thanë se njoftimi thjesht bëri publike atë që kishte qenë e qartë prej kohësh.

"Shtetet e Bashkuara nuk e armatosën papritur hapësirën duke pranuar se i zotërojnë këto kapacitete", shkroi Mallory Stewart, ish-zyrtare e lartë për kontrollin e armëve në Departamentin amerikan të Shtetit. "Gara e armatimit në hapësirë është zhvilluar prej vitesh".