Ngjela: Edi Rama është i qetë për shkak të mungesës së protestave në qytete të tjera

Avokati Spartak Ngjela deklaroi se mungesa e protestave në qytete të tjera është arsyeja pse kryeministri Edi Rama qëndon i qetë përballë protestave kundër qeverisë. Ngjela tha se ndryshimi politik kërkon një lëvizje të vazhdueshme dhe të shpërndarë në rrethe dhe jo protesta të shkëputura të cilat mbahen vetëm në Tiranë.

“Ndryshimi politik do zinxhirë racional dhe jo shkëputje. Çfarë po ndodh këtu? Pse është i qetë Rama? Se nuk ka protesta zinxhir në Durrës, Shkodër, Gjirokastër”, tha Ngjela në një intervistë për “Report Tv”.

Sipas avokatit, faktori ndërkombëtar nuk është kundër protestave apo revoltës qytetare, për sa kohë ato nuk shoqërohen me dhunë. Ai theksoi se përdorimi i dhunës do të sillte menjëherë një qëndrim kundër lëvizjes së protestuesve nga ndërkombëtarët.

“Faktori ndërkombëtar nuk del kundër demokracisë. Ata thonë kundër dhunës sepse do të detyrohen të godasin lëvizjen. Po nuk ka dhunë, ata janë me revoltën dhe demonstratat sepse është filozofia e tyre. Në rast se këtu krijohet dhunë, ata dalin menjëherë kundër”, u shpreh Ngjela.

Por, sipas tij, nëse dhuna do të përdoret nga qeveria për të shpërndarë protestuesit, atëherë kryeministri do të përballej me një situatë të vështirë.

“Në qoftë se partia apo qeveria i shpërndan me dhunë, Rama do të ketë vështirë. Por nuk e ben Rama këtë”, përfundoi Ngjela.