Qindra mijë studentë mblidhen në Beograd përpara zgjedhjeve

Qindra mijë studentë të lëvizjes studentore u mblodhën në Beograd në tubimin e fundit elektoral përpara zgjedhjeve të së dielës. Turmat u drejtuan nga të gjitha anët drejt sheshit qendror Slavija, duke mbushur edhe disa rrugë përreth. Protestuesit valëviten flamuj dhe brohoriten "Fitore", duke shprehur optimizëm përpara votimit, pas gati dy vitesh protestash të udhëhequra nga studentët kundër qeverisë së Aleksandër Vučićit.

Mbështetja për lëvizjen studentore është rritur që nga nëntori i vitit 2024. Lista zgjedhore e studentëve, e njohur si "Lista e Studentëve", sipas sondazheve po konkuron ngushtë me Partinë Progresive Serbe në pushtet.

Analistët paralajmërojnë se një rezultat i ngushtë mund të krijojë pasiguri pas mbylljes së qendrave të votimit, veçanërisht nëse të dyja palët pretendojnë fitoren. Një situatë e tillë mund të rrisë rrezikun e tensioneve dhe destabilitetit politik.

Vučić, i cili ushtron kontroll të konsiderueshëm mbi institucionet shtetërore dhe policinë, ka paralajmëruar se çdo trazirë pas zgjedhjeve do të shtypet me shpejtësi.

Gjatë dy viteve të fundit, dhjetëra studentë janë ndaluar nga autoritetet, ndërsa qeveria ka ndërmarrë masa për të frenuar protestat. Në fushatën zgjedhorë, Vučić ka akuzuar studentët se financohen nga jashtë me synimin për të destabilizuar dhe shkatërruar vendin.

Vëzhguesit ndërkombëtarë të zgjedhjeve dhe Bashkimi Evropian kanë shprehur shqetësimet lidhur me sigurinë dhe drejtësinë e procesit zgjedhor.

Fushata është shoqëruar me akuza për kontroll të gjerë të medias nga qeveria, mbikëqyrje të aktivistëve dhe sulme kibernetike ndaj tyre. Ndërkohë, shoqëria serbe mbetet thellësisht e polarizuar politikisht.

Zgjedhjet e së dielës pritet të jenë një moment vendimtar për skenën politike në Serbi, ndërsa lëvizja studentore synon të shndërrojë mobilizimin e madh qytetar në mbështetje përmes votës.