Dalma Maradona: Babai im meriton drejtësi
Vajza e legjendës së futbollit Diego Maradona, Dalma, ka deklaruar se babai i saj meriton drejtësi në përfundim të procesit gjyqësor në Argjentinë.
Në Gjykatën e San Isidros, në Argjentinë, u mbyll procesi gjyqësor në lidhje me shkaqet e vdekjes së legjendës së futbollit botëror, Diego Armando Maradona. Seanca e fundit ishte ajo e fjalimeve përmbyllëse, fjalime që u ndoqën edhe nga vajza e El Pibe De Oros, Dalma Maradona që e kishte të pamundur të përmbante lotët.
‘Na u desh të dëgjonim gjëra të tmerrshme gjatë këtij procesi, e dinim se çfarë mund të ndodhte -deklaroi Dalma Maradona përballë gjykatësve– e vetmja gjë që kërkoj tani është që babai im të ketë drejtësi. Përtej faktit që është Maradona, ai meriton drejtësi ashtu sikurse çdo person tjetër’.
Tani ajo që mbetet të mësohet në të gjithë këtë çështje është leximi i vendimit për të pandehurit e fiksuar për në 22 dhjetor. Kujtojmë se të pandehur më këtë proces janë 7 punonjës në fushën e shëndetësisë me në krye mjekun neurolog Leopold Luque të cilët rrezikojnë një dënim nga 8 deri në 25 vjet burg.