Zjarr në ambientet e Dritare TV, shkrumbohet regjia e transmetimit

Një zjarr në ambientet e televizionit Dritare TV ka shkaktuar dëme të mëdha në regjinë e transmetimit të televizionit. Drejtuesja e Dritare TV, gazetarja Rudina Xhunga, ka rrëfyer momentet e vështira gjatë përhapjes së flakëve, të cilat, sipas saj, nisen nga tubat e aspirimit të restorantit "Fish Shop" dhe më pas përfshinin ambientet e televizionit. Zjarri ra menjëherë pas përfundimit të xhirimeve të dy emisioneve.

"Po digjeshim", tha Xhunga, duke përshkruar situatën e krijuar dhe përpjekjet për të nxjerrë njerëzit jashtë, për të fikur automatet elektrike dhe për të pritur ndërhyrjen e zjarrfikësve. Gazetarja ka falënderuar forcat zjarrfikëse për ndërhyrjen e shpejtë, ndërsa pasojat e incidentit vijojnë të ndihen edhe pas shuarjes së flakëve.

Përveç dëmeve të shkaktuara nga zjarri, shkrirja e tubave të shkarkimit të ujit dhe të shiut ka sjellë edhe përmbytjen e ambienteve të televizionit. Sipas Xhungës, uji vijon të depërtojë në hapësirat e dëmtuara, duke e vështirësuar më tej situatën.

Ndërkohë, për ngjarjen janë bërë kallëzime në Prokurori dhe Polici, ndërsa pritet që rrethanat e plota të incidentit të shqyrtohen nga autoritetet përkatëse. Përmes një mesazhi drejtuar ndjekësve, Rudina Xhunga ka kërkuar mirëkuptim për uljen e aktivitetit të televizionit gjatë kësaj periudhe, duke siguruar se Dritare TV do të vijojë të jetë pranë publikut.

"Pak aktivitet, por do të vijojmë të jemi bashkë!", shprehet gazetarja. Pavarësisht dëmeve të mëdha në regjinë e transmetimit dhe problemave të shkaktuara nga përmbytja, mesazhi i drejtueses së Dritare TV është se televizioni synon të vijojë aktivitetin dhe të rikthehet pranë ndjekësve të tij.