Kallëzim në SPAK për dhunën policore, kërkohet hetimi i Ramës

Qendra Res Publica, së bashku me organizata të shoqërisë civile, avokatë, studentë dhe qytetarë, ka depozituar një kallëzim penal në Prokurorinë e Posaçme (SPAK), duke kërkuar hetimin e më shumë se 180 rasteve të dyshuara si të paligjshme gjatë protestave të zhvilluara në Tiranë dhe qytete të tjera të vendit.

Në kallëzim, kërkohet të verifikohet nëse bëhet fjalë për veprime individuale të punonjësve të policisë apo për një praktikë të organizuar, të urdhëruar ose të toleruar nga drejtuesit. Në hetim kërkohet të përfshihen drejtori i Përgjithshëm i Policisë së Shtetit, Skënder Hita, drejtori i Policisë së Tiranës, Oliger Torba, si dhe drejtues të tjerë policorë.

Kallëzimi kërkon të administrohen edhe vendimet e Këshillit të Ministrave të 19 dhe 21 tetorit për shpërblimin e punonjësve të policisë me nga 269.120 lekë. Sipas dokumentit, numri i përfituesve u rrit nga 2.750 në 2.821. Kallëzuesit kërkojnë shqyrtimin e listave të përfituesve, kritereve dhe dokumentacionit shoqërues për të verifikuar nëse këto vendimmarrje kanë lidhje me rastet e denoncuara.

Raste të denoncuara përfshijnë përdorim të dyshuar joproporcional të forcës ndaj protestuesve, përdorim të predhave kinetike dhe gazit lotsjellës, arrestime arbitrare, cenim të integritetit fizik e psikologjik, shkelje të mundshme ndaj të miturve, mosdhënie të ndihmës mjekësore dhe trajtim degradues të personave të ndaluar.

Një pjesë e kallëzimit i kushtohet përdorimit të predhave kinetike, të njohura si plumba gome, të cilat dyshohet se janë qëlluar edhe drejt pjesës së sipërme të trupit. Kjo pretendohet se dokumentohet përmes fotografive dhe videove ku protestuesit shfaqen të plagosur në sy, gojë, qafë dhe pjesë të tjera të sipërme të trupit.

Kallëzimi përfshin më shumë se 180 raste të dyshuara gjatë protestave të zhvilluara nga 13 deri më 21 tetor 2026, në Tiranë, Durrës, Shkodër, Korçë, Pogradec, Vlorë dhe qytete të tjera. Sipas dokumentit 29-faqësh, provat përfshijnë pamje filmike, dëshmi, denoncime publike dhe raporte institucionale. Disa prej shqetësimeve, sipas kallëzuesve, janë evidentuar edhe nga Avokati i Popullit dhe organizata që kanë monitoruar protestat.