Lirimi i katër protestuesve të arrestuar për dhunën dhe shkatërrimet në Gjykatën e Apelit

Katër protestuesit e arrestuar për dhunën dhe shkatërrimet në Gjykatën e Apelit janë liruar nga qelia me vendim të Gjykatës së Tiranës. Ata u arrestuan pas protestës së dhunshme, ku godina e Gjykatës së Apelit u kthye në objekt sulmi. Ardit Plaku, Sebastian Rizvani, Lefter Deda dhe Pashk Paluca janë liruar nga qelia dhe ndaj tyre gjyqtari Yrfet Shkreli ka vendosur masën “detyrim paraqitje”. Lirimi i atyre që sulmuan institucionet e drejtësisë vjen pasi Shoqata e Gjyqtarëve reagoi duke i kërkuar kryeministrit të mos paragjykojë vendimet e gjykatave. Por ndërsa gjyqtarët kërkojnë të mos paragjykohen vendimet e tyre dhe i kërkojnë Policisë të garantojë sigurinë e institucioneve, këtë herë është vetë Gjykata e Apelit, godina e së cilës u shkatërrua gjatë protestës, që rikthen në vëmendje mënyrën se si po reagon drejtësia ndaj dhunës kundër institucioneve. Ndërkohë këtë të premte Gjykata e Tiranës ka liruar edhe 16 të arrestuar, për katër prej protestuesve vendosi gjyqtari Edvan Veçani, ndërsa për 12 të tjerë vendosi gjyqtari Sokol Shehu. Gjykata i ka cilësuar arrestet e ligjshme mes tyre dhe arrestimin e një të mituri 14-vjeccar. Gjatë protestave të zhvilluara në kryeqytet persona të maskuar kanë sulmuar institucionet, efektivët e Policisë, bizneset private dhe bankat.