Kosova e varur nga mallrat e huaja: 643 mln euro importe, vetëm 109 mln euro eksporte në shtator

Kosova ka importuar mallra në vlerë prej 643,4 milionë eurosh gjatë muajit shtator 2026, ndërsa eksportet kanë arritur në 109,4 milionë euro. Deficitet tregtar ka kapur vlerën prej 534 milionë eurosh, duke shënuar rritje prej 2,6 për qind krahasuar me shtatorin e vitit të kaluar.

Eksporti i mallrave gjatë shtatorit 2026 është rritur për 27,5 për qind krahasuar me periudhën e njëjtit vit të vitit 2025. Megjithatë, edhe importi ka vazhduar të rritet, duke regjistruar një rritje vjetore prej 6,1 për qind.

Pavarësisht rritjes më të shpejtë të eksporteve, vlera e mallrave të importuara vazhdon të jetë shumë më e lartë se ajo e mallrave të shitura jashtë vendit. Sipas ASK-së, eksportet në shtator kanë mbuluar vetëm 17 për qind të importeve, që nënkupton se për çdo 100 euro mallra të importuara, Kosova ka eksportuar mallra në vlerë prej vetëm 17 eurosh.

Në vlerë monetare, diferenca ndërmjet importeve dhe eksporteve gjatë këtij muaji ka arritur në 534 milionë euro, duke deshmuar hendekun e vazhdueshëm ndërmjet mallrave që Kosova blen nga tregjet e jashtme dhe atyre që arrin të shesë në tregjet ndërkombëtare.

Sa i përket strukturës së eksporteve, metalet bazë dhe artikujt prej tyre kanë përbërë 24,3 për qind të eksporteve të përgjithshme. Pas tyre renditen produktet minerale, me 17,1 për qind, plastika, goma dhe artikujt prej tyre, me 10,3 për qind, si dhe ushqimet e përgatitura, pijet dhe duhani, me 10,1 për qind. Artikujt e ndryshëm të prodhuar kanë përbërë 6,9 për qind të eksporteve.

Në anën tjetër, struktura e importeve tregon se produktet minerale kanë pasur pjesëmarrjen më të madhe, me 19,8 për qind të importeve të përgjithshme. Ushqimet e përgatitura, pijet dhe duhani kanë përbërë 11,8 për qind, mjetet e transportit 11,2 për qind, ndërsa makineritë, pajisjet mekanike dhe elektrike 11,1 për qind. Metalet bazë dhe artikujt prej tyre kanë përbërë 10,1 për qind të importeve.

Sipas ASK-së, eksportet e Kosovës në vendet e Bashkimit Evropian gjatë shtatorit 2026 kanë arritur në 34,2 milionë euro, që përbën rreth 31,3 për qind të eksporteve të përgjithshme. Krahasuar me të njëjtin muaj të vitit paraprak, eksportet në këtë grup vende janë rritur për 22,1 për qind.

Ndër partnerët kryesorë të Kosovës për eksport në Bashkimin Evropian janë Gjermania, me 9,8 për qind të eksporteve të përgjithshme, Holanda me 2,7 për qind dhe Bullgaria me 2,3 për qind.

Ndërkaq, importet nga vendet e Bashkimit Evropian kanë arritur në 281 milionë euro, duke përbërë 43,7 për qind të importeve të përgjithshme. Sipas ASK-së, importet nga ky grup vende janë rritur për 12,7 për qind krahasuar me shtatorin e vitit 2025.

Gjermania është ndër partnerët kryesorë të Kosovës edhe në aspektin e importeve, me pjesëmarrje prej 12,5 për qind. Pas saj renditen Greqia, me 6,5 për qind, dhe Italia, me 4,4 për qind.

Vendet e CEFTA-s kanë përbërë grupin kryesor të destinacioneve të eksporteve të Kosovës gjatë shtatorit. Sipas ASK-së, eksportet drejt këtyre vendeve kanë arritur në 55,6 milionë euro, ose 50,8 për qind të eksporteve të përgjithshme, duke shënuar rritje prej 36,8 për qind krahasuar me të njëjtin muaj të vitit të kaluar.

Shqipëria ka qenë partneri kryesor i Kosovës për eksport brenda këtij grupi, me 25,3 për qind të eksporteve të përgjithshme. Pas saj renditet Maqedonia e Veriut, me 13,9 për qind, Mali i Zi me 5 për qind dhe Serbia me 4,5 për qind.

Në anën tjetër, Kosova ka blerë mallra nga vendet e CEFTA-s në vlerë prej 86,7 milionë eurosh. Kjo shumë përbën 13,5 për qind të importeve të përgjithshme dhe shënon rënien prej 1,2 për qind në krahasim me shtatorin e vitit 2025.

Maqedonia e Veriut ka pasur pjesëmarrjen më të madhe në këtë grup, me 25,3 për qind të importeve të përgjithshme. Pas saj renditet Shqipëria me 13,5 për qind, Mali i Zi me 5 për qind dhe Serbia me 4,5 për qind.