Ish-punonjësi i Eminem pranon fajësinë për shkeljen e të drejtave të autorit

Joseph Strange, një ish-punonjës i reperit Eminem, ka pranuar fajësinë për shkeljen e të drejtave të autorit. Ai ka kopjuar dhe shitur pa leje këngë të papublikuara të artistit, duke përfituar rreth 50 mijë dollarë.

Strange ka punuar në studion muzikore të reperit në Michigan nga viti 2007 deri në vitin 2021. Gjatë kësaj periudhe, ai kishte akses në disqe të mbrojtura me fjalëkëllim, ku ruheshin materiale muzikore që Eminem po përgatiste për publikime të mundshme në të ardhmen.

Hetimet zbuluan se Strange kishte kopjuar të paktën 10 skedarë muzikorë pa autorizim dhe, gjatë muajve korrik dhe gusht të vitit 2024, ua kishte shitur blerësve në internet. Materialet përfunduan më pas në platformat publike të transmetimit muzikor, pa dijeninë apo lejen e reperit.

Sipas të dhënave deri në nëntor të vitit 2025, skedarët e identifikuar në kuadër të hetimit ishin aksesuar më shumë se tetë milionë herë. Autoritetet vlerësojnë se dëmi nga shkelja e të drejtave të autorit arrin të paktën 750 mijë dollarë.

Rasti u bë objekt i hetimit nga FBI-ja pasi punonjës të studios zbuluan se muzika e papublikuar ishte shfaqur në internet. Gjatë kontrollit në banesën e Strange, autoritetet gjetën gjithashtu disqe me materiale muzikore të reperit dhe tekste të shkruara me dorë.

Përfaqësues të Eminem kanë theksuar më herët se ngjarja i ka shkaktuar dem të konsiderueshëm trashëgimisë artistike dhe interesave financiare të reperit dhe bashkëpunëtorëve të tij. Strange pritet të marrë dënimin më 27 janar 2027. Ai përballëhet me një dënim maksimal prej pesë vitesh burg për veprimin penal që pranoi fajësinë.