Protesta kombëtare/ 1500 efektivë policie në terren, autobotet me ujë vendosen pranë Kryeministrisë

Rreth 1500 efektivë të Policisë së Shqipërisë janë dislokuar në terren për të mbështetur mbarëvajtjen e protestave që pritet të nisen në orën 12:00 para Kryeministrisë. Në zonën përreth godinës së qeverisë janë vendosur edhe disa autobote me ujë, të cilat mund të përdoren në rast të përshtalljes së situatës.

Kryeministri Edi Rama ndodhet në zyrën e tij në Kryeministri, ndërsa ftesa e tij për dialog është refuzuar sërish. Disa protestues kanë hequr jastëke të vendosur jashtë godinës së qeverisë, së bashku me letrat ku shkruhej "dialog".

Ndërkohë, në orën 14:00 pritet të zhvillohet edhe protesta e studentëve para Ministrisë së Arsimit. Studentët, të cilët sot shënojnë ditën e 12-të të protestave në Tiranë, pritet të mbështeten nga pedagogë dhe përfaqësues të disa profesioneve dhe organizatave të shoqërisë civile.

Solidaritet me studentët ka shprehur artistët, punonjësit e medias, inxhinierët, arkitektët dhe sindikatat. Sindikata e Pavarur e Artit, Kulturës dhe Medias së Shqipërisë ka njoftuar se do të mblidhet në orën 11:00 përpara Kryeministrisë, për të bashkuar me pas tubimit të studentëve pranë Ministrisë së Arsimit.

Sindikata u ka bërë thirrje artistëve dhe punonjësve të kulturës dhe medias të marrin pjesë në protestë, në shenjë mbështetjeje për studentët, të rinjtë dhe qytetarët. Edhe inxhinierët dhe arkitektët pritet të bashkohen me studentët, ndërsa solidaritet me protestën ka shprehur edhe Sindikata e Bashkuar e Arsimit Shqiptar.

Organizatorët e tubimeve kanë theksuar se angazhimi i tyre nuk lidhet me ndonjë parti politike, por synon të mbështesë qytetarët dhe kërkesat e studentëve. Ata u kanë bërë thirrje qytetarëve të marrin pjesë jo vetëm si profesionistë, por edhe si prindër dhe pjesëtarë të shoqërisë.

Në zonën përreth Kryeministrisë janë konstatuar forca të shtuara policore, ndërsa në momentin e raportimit qarkullimi i automjeteve dhe lëvizja e qytetarëve vijon normalisht.