Kaos në qendër të Tiranës, policia 'blindon' selinë e PS
Protesta kombëtare e kësaj të shtunë, në ditën e 12-të të mobilizimit studentor, ka mbledhur një numër të madh qytetarësh që mbështesin kërkesën e studentëve për largimin e kryeministrit Edi Rama.
Situata në sheshin “Skënderbej” vijon të jetë kaotike, ndërsa policia ka bllokuar një nga daljet e sheshit, pikërisht në zonën ku ndodhet selia e Partisë Socialiste. Forca të shumta policore janë dislokuar në këtë pikë, duke penguar kalimin e protestuesve.
Tensionet në Tiranë vijojnë të përshkallëzojnë, ndërsa sheshi “Skënderbej” mbetet një nga pikat kryesore ku janë përqendruar protestuesit dhe forcat e rendit gjatë pasdites së kësaj të shtunë.
Policia ka bllokuar daljen në njërin prej cepave të sheshit, pranë selisë së Partisë Socialiste, ku është vendosur një prani e madhe e efektivesh. Forcat e rendit kanë krijuar një kordon policor në këtë zonë, duke penguar lëvizjen e protestuesve në drejtim të rrugës pranë selisë së socialistëve.
Bllokimi i kësaj daljeje vjen në një moment kur një pjesë e madhe e turmës ndodhet ende në sheshin “Skënderbej”, pas ndërhyrjeve të vazhdueshme të policisë me gaz lotshelles.
Gjatë orëve të fundit, policia ka përdorur sasi të mëdha gazi për shpërndarjen e protestuesve, ndërsa turma është zhvendosur disa herë mes sheshit dhe rrugëve përreth.
Paralelisht, bulevardi “Dëshmorët e Kombit” është blinduar me forca të shumta policore dhe dy automjete ujëhedhëse, të pozicionuara pranë Kryeministrit.
Protesta kombëtare e kësaj të shtunë, në ditën e 12-të të mobilizimit studentor, ka mbledhur një numër të madh qytetarësh që mbështesin kërkesën e studentëve për largimin e kryeministrit Edi Rama.
Me daljen pranë selisë së PS të bllokuar dhe praninë e shtuar të policisë në disa pikë, lëvizja e protestuesve në sheshin “Skënderbej” është kufizuar, ndërsa situata mbetet e tensionuar.