Turma zhvendoset drejt Parlamentit, përplasje të forta pranë Ushtarit të Panjohur

Gjatë përplasjeve, protestuesit kanë hedhur fishekzjarre në drejtim të efektivëve të policisë, duke tensionuar më tej situatën në qytetin kryeqytet. Një numër i madh protestuesish është larguar nga sheshi "Skënderbej" dhe ka marshuar drejt zonës së Nëntëkatësheve, për të kaluar më pas nga Ushtari i Panjohur dhe për të mbërritur pranë godinës së Kuvendit. Në kryqëzimin e Nëntëkatësheve, protestuesit kanë vendosur kosha mbeturinash në rrugë, duke bllokuar qarkullimin e automjeteve. Ndërkohë, në bulevardin "Dëshmorët e Kombit", forcat e policisë kanë krijuar një kordon për të penguar kalimin e protestuesve. Në protestën e kësaj shtune vihet re një pjesëmarrje masive, ashtu siç ishte paralajmëruar edhe më herët. Përplasjet pranë Ushtarit të Panjohur vijnë pas incidenteve të regjistruara në sheshin "Skënderbej" dhe pranë selisë së Partisë Socialiste, ku gjatë orëve të fundit janë shënuar përplasje mes protestuesve dhe forcave të rendit. Situata vijon të jetë e tensionuar, ndërsa protestuesit po përpiqen të avancojnë drejt Parlamentit.